那些癌症教曉我們的事(3)- 對自己好啲, 別做”爛好人”!

除咗學識要收順啲, 仲要學識對自己好啲! 經常發現, 做老師,銀行業或者社福界嘅病人都好容易生Cancer! 一方面佢哋好識得虐待自己, 經常挑戰人體極限! 另一方面佢哋亦都有一啲好識得虐待佢哋嘅上司……呢啲都唔係世衛認可的一級致癌物! 所以防不勝防!

所謂”爛好人”, 就係毀曲自己成全身邊所有人嘅人! 即係唔識得 Say “No”嘅人, 就連生Cancer 都要一個星期後先至請病假嘅人, 因為佢哋好有責任心, 不但止要對上司負責, 還要對同事負責, 但係對自己唔負責! 最恐怖嘅係, “爛好人”一般都係走火入魔, 要佢哋 say “No” 仲難過叫佢哋將啲嘢做曬! 要佢哋 say “No”, 佢哋會成晚都瞓唔著! 完全唔覺得自己喺度虐待緊自己, 好恐怖! 最恐怖嘅係, “爛好人”+ 虐待人嘅上司+自私嘅同事= 遲早生Cancer! 只係遲定早的問題. (溫馨提示: 最好買重保險, 因為保險公司仲未識得將呢啲風險事項加loading!!🙈)

劫後重生, 重回工作崗位的”爛好人”, 一般都會萬劫不復! 通常”爛好人”都會以為放完病假之後, 重回崗位嘅時候, 大家都會對佢哋體諒啲, 做嘢應該會順利啲, 日子應該會好過啲! 呢樣嘢好講彩數, 其實出得事嘅”爛好人”好多時候身邊都係冇乜好人, 如果唔係”爛好人”都應該唔會出事, 所以千祈唔好期望過高! 你返得工, 人哋就預你做得嘢, 而且仲要預你做返之前嗰份, 千其唔好咁天真! 已經見過無數病人, 復工後繼續日日夜夜被折磨, 然後身體陸續出現唔同程度嘅問題, 焦慮事小, 抑鬱,復發事大……所以, 一定要學識保護自己, 對自己好啲!

那麼, 如何脫”爛”呢? 正所謂冰封三尺非一日之寒, 江山易改, 本性難移! 脫”離”對於爛好人來說同戒毒應該都冇乜分別! 劫後重新仍要返回舊路的話, ”爛好人”將來一定會後悔, 所以再難也要改變自己, 對自己好啲! 為咗份工冇命, 只會多一個花牌, 多一啲帛金, 公司永遠冇話冇咗邊個唔得! 但係對於屋企來說, 就冇咗一個重要嘅成員!

首先, 唔做”爛好人”不等於做壞人! 只係對不合理嘅事 Say No, 而唔係欺壓身邊嘅人! 要糾正慣性把”不合理的事合理化”的思想, 訂立善良的底線! 一旦過咗底線, 就要 Say No! 通常最難都是頭幾次 Say No, 練習多了, 便熟能生巧! 慢慢便會適應下來!

其次, 千萬不要心存僥幸! 以為時間會將身邊的壞人 (e.g. 變態上司, 自私同事) 變走, 這個發生的可能性很低, 因為”爛好人”通常都會短命啲 (變態上司, 自私同事通常放負能力極高, 身體都健康啲)， 鬥長命輸硬, 所以, 要坐言起行, 對自己好啲嘅計劃要即時生效!

由於我太多病人都係”爛好人”, 自己以前都係”爛好人”, 好多病人都提醒我唔好步佢哋後塵, 所以我已經 level up, 冇做”爛好人”好耐, 我係一個合理嘅好人😆, 大家都要一齊努力啊!

黃麗珊醫生 臨床腫瘤科專科

那些癌症教曉我們的事 (2)- 點樣為之收順啲?

之前同大家講過收順啲,身體都好啲! 但係點樣可以做到收順啲?其實知易難行, 每天都要持續修煉! 簡單啲嚟講, 每當你遇到有一啲你覺得唔係好順嘅事, 你覺得有壓力嘅事, 都可以停一停! 諗一諗, 唔好畀自己中自己嘅圈套!

其實每一日大大小小嘅事都有機會係完美主義set嘅圈套! 簡單如食飯, 其實已經好多病人好煩惱!! 100% 病人都會問我關於戒口嘅事. 其實西醫角度嚟講, 除咗高血壓, 高血脂, 糖尿病, 痛風症和過敏症有關的病等等一定需要戒口之外, 大部分疾病包括腫瘤, 一般都冇需要戒口. 腫瘤科醫生一般都會建議均衡飲食, 注意衛生, 多菜少肉, 紅肉比例要比較少, 避免用高溫烹調肉類, 避免攝取過量熱量, 對於乳癌病人, 我們會建議避免進食含有雌激素成分的食物, 整體來說, 我們就只有這些建議了.

由於網絡世界充滿著氾濫嘅資料, 似是而非, 而且有啲又唔 update, 再加上姨媽姑姐同埋大量朋友嘅溫馨提示, 你唔難發現, 如果跟足網絡資料再加埋親朋戚友嘅建議, 其實乜嘢都唔可以食, 即係話……地球真係好危險, 食乜嘢嘢都有機會令腫瘤復發! 食啖飯都好大壓力! 食啖飯負能量都爆標! 就算食啲乜有營養而又健康嘅嘢你都唔會吸收得到, 但一定會吸收到負能量. 一日又要食三餐, 食足三餐負能量, 係唔係好大鑊先! 而且, 大部份嘅飯餸已經係非常清淡, 要極大嘅意志力先至可以長時間食淡而無味嘅食物, 真係人都癲! 所以, 記得要收順啲! 只要遵守基本大道理又食得開心係最緊要嘅, 間唔中放下自己假, 一次半次食啲唔係好健康但有益心靈嘅嘢都冇乜所謂! 如果唔係便會喪失抗癌嘅鬥志, 得不償失.

除咗食嘢之外, 日常生活每一件事都可以練習, 如果你搭唔到一班車, 你嘅心情可能好差, 覺得嘥曬啲時間, 或者呢一樣係一個天意, 你可以一路等車一路試下做拉筋練習, 又可以一路練習靜觀, 話唔定下一班車少啲人搭, 坐得輕鬆啲, 永遠冇人知點樣嘅安排才是最好的, 就讓我們嘅人生順着安排而行, 就是所謂的收順啲!

即使我係醫生, 在別人的眼中事業有成, 事事如意, 亦並不是大家想象的活得那麼輕松! 其實我每天都在不同的崗位打怪獸! 我每天都是很努力地學習如何收順啲, 對自己好啲! 大家要一齊努力!

P.S.
這張相是昨天我們一家到錦田打理田園時拍攝的, 多功能公公和我在努力收割, 爸爸和兩個女兒在hea, 如果一個阿媽見到兩個女坐得咁哩啡, 一啲都唔似女仔, 仲要掛住睇電話唔幫手! 作為一個醫生, 見到佢哋坐姿唔正確會傷害脊椎, 影響日後發展, 睇電話會傷害眼睛, 亦會影響專注力, 影響學習進度……好難唔眼火爆! 但諗深一層, 又覺得呢個畫面其實都幾溫馨, 都係收順啲好…..結果我家有一個美好的週末.

黃麗珊醫生 臨床腫瘤科專科

那些癌症教曉我們的事 (1) – 凡事收順啲,復發都少啲!

無數嘅病人都同我講過覺得好唔甘心好唔抵, 因為佢哋從來都非常注重健康, 不但止冇不良飲食習慣, 而且作息定時又有適當運動, 冇食煙冇飲酒, 又冇家族史,亦都冇做過任何傷天害理嘅事, 點解會生Cancer! 相反, 有啲又煙又酒嘅人又好好地, 乜事都冇, 真係令人好唔憤氣.

即使現在醫學科技發達, 我哋仲未有方法可以準確掌握每位病人之所以患癌嘅原因, “唔好彩”就變成唯一嘅成因了! 向來鍾意同病人吹水嘅我, 其實發現好多病人都有一個共通點, 就係唔知道自己用好大嘅力氣去維持健康嘅生活習慣! 結果無時無刻都活在壓力當中而不自知. (e.g. 連食碗公仔麵都覺得好邪惡!). 其實呢類型嘅人唔單止係生活習慣上無時無刻都有無形壓力, 其他所有大大小小的事都是追求完美而不自知, 大部份都係非常做得野嘅人, 所以一旦有病嘅時候, 都會覺得好大鑊, 一方面好難接受自己又 Cancer, 另一方面覺得如果自己要停下來醫病的話, 頭家會散, 同事會好大鑊, 唔好意思做死啲同事……Stop! 有病嘅時候竟然唔係諗自己先, 有冇諗過其實呢一個係一個病態! 甚至有啲變態! 變態而不自知, 更變態!! 相反, 又煙又酒又經常爆粗嘅人, 因為佢哋實在太過善於釋放負能量, 反而身體健康! 我哋唔係鼓勵大家食煙飲酒同爆粗, 而係我想強調”負能量”比一級致癌物更加毒!!

我經常同病人講, 唔好將生 Cancer 諗成人生嘅一個 FULL STOP! 應該將佢諗成爲一個 PAUSE! 如果冇呢一個 PAUSE! 你唔會有呢個機會停下來, 好好反思一下你嘅人生! 生老病死係每一個人人生嘅必經階段, 如果喺人生比較早嘅階段便要面對生Cancer, 呢個苦難可能係對你有一啲嘅信息! 一啲嘅人生體會! 唔難發現, 唔病都唔知原來自己好幸福, 原來身邊有好多關心自己嘅人 (甚至有太多人關心, 覺得好煩.), 亦都有人發現, 原來自己好禁捱! 畢竟從前健康嘅生活習慣令佢哋接受治療嘅時候承受副作用嘅能力都比較高, 所以之前嘅努力其實一啲都冇白費!

曾經有一個獨居冇乜朋友又有嚴重抑鬱嘅病人問我, 我唔知我生存為啲乜? 點解天父只會比苦難我, 一啲關心都唔俾我? 作為一個醫生, 我唔可能為每個病人定下生存意義, 我只可以講, 一日天父未 call 我哋返天家, 我哋總有啲用處, 你而家唔知道, 你將來一定會知道! 你既然生Cancer都唔死得, 因為抑鬱呢個病你又唔驚死, 你我有緣相會, 有機會俾我關心你(要知道，就算有錢要到我診所見我，亦未必可以安排到🙈), 我相信呢一個唔係一個偶然, 就讓大家每天都坦蕩蕩地活着, 只有活着, 才有機會找到生存的意義!

趁著治療腫瘤呢個長假期嘅時候, 可以好好反思一下, PAUSED 完結之後你想過怎樣的下半場! 在此, 我想溫馨提示一下大家, 學會”凡事收順啲”, 你嘅下半場一定會好過啲, 你嘅家人亦一定會好過啲! 千祈唔好輕視負能量對身體嘅影響! 要知道, 對每件事都過分執著未必有你預期嘅效果, 但當中引起嘅負能量對你嘅身體一定有影響, 對你的家都一定有影響. 學會收順啲, 負能量都少啲!

人嘅身體同埋心靈都總有瑕疵, 接納不完美, 凡事收順啲, 病痛都少啲, 這個是一世人的修行, 我們大家都要努力!

黃麗珊醫生 臨床腫瘤科專科

暱稱身上癌症為「Clarence」　香港末期卵巢癌患者：活着就有希望

撰文：紅出版集團 2021-01-20 21:30 最後更新日期：2021-01-20 21:30

她明知「它」以後會長伴自己左右，索性給起了個暱稱叫Clarence——跟它原來的名字一樣，都是以英文字母C起頭的。（以下內容節錄自《人人都能明白：精準癌症治療》。）

文：內科腫瘤科專科黃曉恩醫生、癌症資訊網

她十多年前因為工作關係從英國來到香港。雖然這麼多年來她都把香港當成老家，甚至把本來在英國獨居的母親都接過來了，但是她有她的堅持，例如只講純正的英語——當然在小巴司機完全聽不懂而車子快要不停站時，廣東話可以衝口而出。

四年前，它進入了她的生命，真名 Cancer。它是卵巢癌，還是透明細胞類：少於百分之五的卵巢癌由這種細胞引起，因有抗藥性並預後不佳而惡名昭著，一般第四期的五年存活率十分渺茫。

她接受手術並化療後復發，擴散到肺、肝、骨及淋巴。再化療無效，而BRCA1/2 單一基因檢測驗出並無變異，並不適合用已經通過認證的 PARP抑制劑。就在這急轉直下的情況下，她首次到我診所求醫，我自然暗揑一把汗。我們進行腫瘤全面基因體檢測，結果發現了 ARID1A 缺失及 PIK3CA兩種基因變異。

				1

有研究顯示 ARID1A 缺失與微衛星不穩定性有關聯，而免疫治療在微衛星不穩定性高的腫瘤特別有效：至於 PIK3CA 亦有相對應的標靶藥。雖然帶有基因突變並不保證免疫或標靶治療一定有效，而且兩種藥物都未在卵巢癌通過認證，但是在沒有更好的治療方案下，我們決定一試。

這正中 Clarence 要害，癌細胞節節敗退！病情不但明顯改善，且維持了很長時間;她剛邁進確診後的第五年，狀態甚佳，還有上班、參與朋友聚會及照顧母親。期間病情一度有變，我們再次進行全面基因體分析，發現可能與抗藥性有關、新增的基因變異，從而發現可轉用其他針對性的藥物。

除了說英語外，活著是她另一個堅持。她告訴我：「活著，就有希望！那怕癌症不斷變異突破藥物的抑制，只要能檢測出來，便有望使用新的藥物。」這想法大概是過份簡單，但她堅毅的精神總是啟發醫者患者都繼續努力。

文章出處: HK01

黃曉恩醫生 內科腫瘤科專科醫生

檢視 黃曉恩醫生 的所有文章

<<如何增加抗壓力和提升心理健康>>下集

上回講到食物, 腸胃健康,同埋精神健康嘅關聯性. 今期繼續深入探討.

再講多小小腸胃, 西醫有所謂的”身心病症”,psychosomatic symptoms, 亦即係話身體有一些症狀可能是由情緒緊張引起. 例如係緊張嘅時候不少人會有胃痛和肚瀉, 又或者悲哀嗰度會有心口翳悶甚至心痛嘅症狀. 亦即係話我哋嘅腦部感覺影響咗一些症狀嘅出現. 喺中醫睇嚟其實調返轉都得. 最常見係因為腸胃問題令到心情差. 有不少長期食滯或者大便秘結不通嘅人, 都會發覺心情非常煩躁, 而且集中力低下.

中醫最拿手就係治療這一啲腸胃積滯所引起的情緒問題. 透過利用好似中成藥”保和丸”, 再加少少通利大便藥物, 清化濕熱, 就可以令到大便暢通, 而人覺得精神爽利, 頭腦都較清晰. 遇到呢啲情況就唔可以定係教病人點樣放鬆心情, 而係透過調理腸胃令到心情更加好. 臨床上發現有不少小朋友經常集中力低下, 而且性格急躁成日扭計, 可以利用中藥調理腸胃, 會慢慢發現小朋友的注意力增強, 連讀書都可以有所幫助. 成人都有類似嘅情況, 調理腸胃治療後,會覺得腦海較清晰情緒較穩定.

除咗腸胃之外仲要留意一樣嘢叫做body capital. 用中醫的術語即是固本培元的”本”. 用較為貼近生活嘅就好似”本金”一樣. 打個比如就好似2020年年頭的股票大波動. 若然本身的本錢較多, 根基穩固, 即使股市大幅滑落, 都能處之泰然, 而且甚至可以低位度入貨. 但本身如果本金不足, 仲要借落唔少錢, 小小跌幾個價位已經嚇到魂飛魄散, 仲要俾人追孖展, 痛不欲生. 用呢個比喻唔係鼓勵大家炒股. 而係身體的本錢都是同一樣道理. 平日如果身體本錢充足, 即中醫所講的氣血陰陽平衡而且充足, 則即使面對生活上或者工作上的一小小壓力, 都能輕易處理唔會覺得心情很辛苦.

所以有一些病人有驚恐症或者是情緒抑鬱的, 喺中醫睇嚟都係一些較為虛弱的體質.例如本身是非常瘦弱, 或者有一些雖然身形龐大, 但係舌頭縮小, 舌苔剝落, 呢啲屬於氣陰兩虛的體質. 治療呢啲情況唔能夠只係用傳統疏肝解鬱的中藥, 一定要從根本地補氣養陰, 重新鞏固身體的根基. 否則本錢不足, 難以回復. 呢啲就係中醫所講固本培元. 亦即係鞏固本金, 培養元氣! 本金充足自然會有元氣!元氣充足自然心情開朗平靜.

噉除咗食好嘅食物(上期已經說了) ,同埋食中藥進補之外, 仲有什麼方法可以增加身體的本錢呢. 香港人最常忽略的亦都係最重要的, 就係瞓覺. 而且係適當嘅時候瞓覺. 之前都講過一個人大約每日至少要訓八小時, 身體的腦部和各種筋骨肌肉先至得到充分的休息和營養. 而且瞓覺是要在晚上11時或之前睡眠, 連續瞓八小時先至係補身. 斷斷續續訓覺又或者日夜顛倒, 又或者長時間瞓晏覺但係夜晚瞓唔著, 都唔會達到這種補身的功效. 當然你話如果有一排工作很忙, 又或者其他原因, 瞓得好少短期是沒有問題的. 因為正如上述所講身體有本錢去應付這些支出. 但如果平時經常入不敷支身體總會倒下. 唔夠瞓嘅病人通常會比較神經質, 小小事就容易發脾氣, 而且做嘢嘅時候事倍功半, 其實得不償失. 對於仍然讀書嘅學生呢個情況一定要注意, 要有好的記憶力和學習能力, 每晚一定要有充足的睡眠, 尤其是考試之前. 呢個喺近來嗰條youtube片嗰度已經講咗 .

最後想講下做運動. 其實經常做帶氧運動的確係會令到人開心. 而且面對壓力的時候更加硬淨. 終於有所謂氣血流通, 精神自得. 做運動就真的可以放松身體的筋骨肌肉經絡, 有助血氣回流, 久不久去跑下步或者喺屋企做下運動, 都可以達到相同的效果. 另外而家越嚟越多人輕拉筋, 拉筋亦都可以放鬆某些肌肉和筋腱, 亦都可以達到以上所講氣血流通經脈暢通的效果. 如果有讀者是玩瑜伽的, 就更加好. 除咗是幫助身體的關節肌肉筋骨活動之外, 亦可以調節心情. 一舉兩得. 當然最好啲做運動就是在戶外聆聽甚至有綠草涼風的地方就最好. 例如戶外的跑步對於放鬆心情遠比在室內treadmill優勝, 唔信嘅大家可以去試下.

此外還有一些簡單的按摩方法可以放鬆心情. 最好的就是按摩頸部和膊頭交會的肩井穴, 一般按落去都非常酸痛. 如果家中有家人懂得一點按摩, 又或者用按摩機等放鬆呢個穴位附近啲肌肉, 效果良好的會感到有一股氣從身下便, 往頭兩側面衝. 噉就可以達到疏肝解鬱. 若果經過一天工作感到頭昏腦脹, 你可以試下呢個方法, 頭部耳仔以上的兩邊脹痛和沉重的感覺可以豁然消失, 心情和全身都放鬆. 詳細點樣做我遲啲會出一條youtube片去解釋下.

蘇子謙醫生 (臨床腫瘤專科)

由呢一樽我介紹嘅豆漿講起

話說之前喺健康餐廳嘅群組介紹過呢一種由有機黃豆製成嘅豆漿。 好似係當中冇防腐劑，而且真係豆味濃郁。 最平嘅時候試過差唔多一公升一盒嘅就將隻係賣12蚊港幣。 由美國運過嚟真係平到你唔信。 其實正價都只不過係25蚊一盒左右。

當年今期唔係講豆漿究竟有咩醫療功效。 而係近這幾個月已經發現越嚟越難搵到呢一種豆漿。

上網一check原來唔單止香港斷曬貨。 連美國嗰邊都斷曬貨。 點解會咁呢?

原來由上年年尾開始，世界各地方嘅原材料價格急劇上漲。 連黃豆呢啲必需品都將架四至五成。 特別係有機嘅黃豆就更加如此。 再加上 疫症因素令到物流和生產力下降。 而且美國嘅勞動力下降， 進入有工都冇人做嘅時代。 所以因為成本急劇上升命一間豆漿廠做唔切豆漿，索性減產和停產。

一葉知秋， 其實喺美國和全世界好似通脹正在來臨。 唔單止係食品和食用原材料， 甚至係藥物製造嘅原材料和藥品嘅供應也受到好大影響。 之前聽講過其中一隻常用嘅化療藥全世界都唔夠貨，主要因為製造嘅原材料不足。

現時不少抗癌藥， 其實都係有外國進口， 幸好現在暫時香港嘅藥物供應還是非常穩定。

另一方面其實中藥和中藥製品嘅成本喺新一年亦都顯著上升。

只希望呢一波嘅“醫療通脹”， 唔會影響太過深遠。