過去呢十日既治療裡面,基本上每日都會食全反式維甲酸(欖球丸),都會打一支毛菌針及食一次砒霜!同埋朝朝要俾人拮一針抽血…………………..
食完欖球丸好多時都會頭痛到要食止痛藥先可以休息到,而砒霜既副作用對我黎講就更大更辛苦,食完砒霜會胃痛、反胃、作嘔、頭暈,成個人都好唔舒服同埋好支,差唔多每日都係訓、訓、訓。完全無心機食野,只係想休息。最慘係有時食完野後會嘔返出黎,個感覺好差,情願唔食咁多,其實係食唔落咁多。每日最主要既吸收部份就係媽媽爸爸帶黎既湯水。
另外,差唔多每一日都因為血小板指數唔夠50 (正常係160-350)而每次要輸4包血小板。起初都無咩特別,而且都幾快輸完,但後來啲血管愈黎愈差,落得愈黎愈慢,同埋開始有過敏反應,會全身痕同埋發燒。同埋隔3日左右又會因為唔夠血紅素而輸血。
化療既辛苦程度就更唔使講啦,痛到無朋友,化完仲要反胃同作嘔,真係救命!
因為輸血、化療、落藥等等,好多時阿日就要開新豆豆,因為血管用過未必可再用,所以打豆豆所需時間愈來愈長,甚至要打2-3針先打到
對於咁有盼望同信心既我,都會有一刻因為好辛苦想放棄治療,見到啲藥都唔想食,我終於明白點解咁多人有癌症都唔選擇化療了!
不過,感恩我有愛我的上帝、媽媽、爸爸、六毛仔、同一班朋友仔,我絕對知道我為什麼堅持,但其實我邊有能力可以堅持吖,咪全靠耶穌得勝,我知道今次經歷是為了將榮耀歸上帝。