文章
其他 > <舊區. 歷史.瘟疫>

<舊區. 歷史.瘟疫>

23-01-2021

<舊區. 歷史.瘟疫>

今朝早起身睇新聞, 發覺政府已經正式封閉佐敦一帶的街道, 務求所有居民都首先進行快速檢測, 找出隱性感染, 截斷傳播鏈.

其實舊區嘅衛生環境一向都是問題, 是傳染病爆發的溫床.

其實喺19世紀末, 大約係1894年嘅時候, 香港上環一帶都曾經爆發鼠疫. 當時其中一個公共衛生的問題, 就係華人聚居在太平山街一帶的地方, 居住環境擠迫,衛生惡劣, 基本上人同老鼠一齊住. 老鼠帶有細菌就喺呢一啲貧民區大爆發. 華人的死亡率差不多有九成多. 那個時候公共衛生政策唔多,而且香港政府規模有限, 當時也不知道病源是什麼. 除咗要隔離患病病人, 屍體要特別處理, 那時有關當局亦知道, 必須消毒患者屋企, 整頓惡劣的居住環境, 先可以撲滅鼠疫.

最後由於太平山街的疫症特別嚴重, 那是政府利用緊急法, 強行收回土地被清拆房屋. 並重新安置居民. 而家上環的卜公花園, 就係100多年前本身爆發疫症的民房. 另外我哋而家成日講嘅”洗太平地”, 起源就係來自當年的疫症.

時光機回到2021年, 今次病症較為多的舊區, 位於油尖旺. 當然在深水埗又或者在港島區的西環灣仔也充滿這些舊區. 疫症會否也會在這些舊區大規模爆發還是未知之數.

長遠要解決問題的方法, 是要審視這些舊區的居住環境, 例如舊區大廈的渠務, 是一個非常頭疼的問題. 亂咁駁渠基本上係非常常見. 而且加上這些舊式大廈日久失修, 業權又分散, 又冇人肯夾錢維修整棟大廈. 就算今次COVID19最後大步攬過, 遲啲若然又有新嘅傳染病這些舊區亦會是一個爆發點.

此外這些舊區亦都有大量劏房, 而且很多是商住兩用的大廈. 衛生情況令人擔憂. 但係又唔可能好似100多年前強行清拆曬呢一些舊區. 因爲要重建之前, 必先有足夠的房屋去安置當地的居民, 土地問題唔係容易解決. 再加上這一些舊區有不少特色, 若然全面清拆會減低咗該區嘅集體回憶.

不如政府可以考慮下, 資助呢啲舊區大廈進行全面渠務檢查和更換, 好過一出咗事成日搵袁國勇晚晚去睇下邊度有滲漏….. 呢啲錢其實唔慳得. 此外不如都學下某些地方一樣, 居住人均面積有最低下限, 即係話唔可以再起埋呢啲劏房, 否則傳染病爆發其實是全香港一齊承受.

我諗以前九龍城寨被清拆衛生問題都是一個最大原因.

所以有時健康問題唔係淨係話有醫院就解決到, 公共衛生問題,歸根究底都同房屋問題,環境問題,同埋政府財政密切相關.

蘇子謙醫生
(臨床腫瘤專科)

城中活動

2024-04-12 9:00 上午 小帆船體驗
2024-03-22 10:00 上午 九龍區癌症復康診所計劃

疑難排解

會員註冊


或許你會想看