作者：Dave

潮流興用 CBD oil, 對癌症病人有冇幫助?

時代唔同咗, 除咗要 update 最新嘅醫學資訊, 還要 update 市場最潮流嘅資訊! 經常被病人問五花八門的保健資料, 有時真係口啞啞, 與其講唔知, 不如用專業知識幫一幫大家 factcheck 埋一份, 一方面又幫到大家, 另一方面又學到嘢, 一舉兩得.

即使係醫生, 聽到 CBD 一開始都有種感覺以為係一般犯法嘅大麻, 但係病人又點會犯法呢? 首先, 大麻植物含有超過一百種大麻素，只有兩種最多人講! THC 以及 CBD, 而 THC 才是犯法的大麻素.

THC- Tetrahydrocannabinol (四氫大麻酚) 可以令人high high地, 好 relax, 會令人上癮! 美國亦有使用這些配方來幫癌症病人止嘔, 但THC 在香港是不合法的, 而且 THC 對比其他止嘔藥成效亦不是特別出眾, 所以香港亦無需要引入這類型的藥物幫助病人.

CBD- Cannabidiol (大麻二酚) 不會引致上癮, 不會有提神作用, 所以在香港使用是合法的! 有不同的初步數據顯示 CBD 可以刺激體內的大麻素受體（Cannabinoid receptors）, 有機會平复情緒, 幫助減壓, 似乎有機會幫助壓力大的癌症病人放鬆心情, 但是是否真的有數據證明這個理論有效? 另外, CBD 有沒有跟其他抗癌治療有衝突? 而且 CBD oil 或者其他食品對癌症病人有沒有存在風險?

CBD醫學功效: 現在唯一FDA認可CBD的治療效果是用於癲癇治療藥物, 並沒有有力數據支持 CBD有任何抗癌效果, 亦未有有力數據證明 CBD 可以有效幫助癌症病人舒緩焦慮情緒.

CBD oil 有沒有機會同其他抗癌治療有衝突? 答案係唔知. 因為醫療數據欠奉! 如果病人在治療期間想試用 CBD oil, 便要緊密監測病人所有狀況以確保沒有額外不良反應.

CBD oil / 其他食品對癌症病人有沒有存在風險? 暫時沒有太多數據建議CBD的安全劑量, 一般都不建議孕婦、小兒、老人家及長期病患使用, 通常建議每天不超過60毫克, 如服用後出現不適便要立即停止使用. 由於癌症病人除了抗癌治療藥物外, 還有其他多種藥物輔助治療例如安眠藥, 血清素, 鎮靜劑等等, 所以要非常小心. 至於其他 CBD食品, 癌症病人便要注意食物標籤, 小心攝取過量糖份! 另外, 由於難以確定是否單純含有CBD成分, 如果當中有少量THC即屬違法 (因為提煉過程當中, 很難確保只是能抽取 CBD成分, 所以大家要非常小心)

總括而言, 純正 CBD oil 不屬違法, 適量分量應該對身體冇害, 有機會幫助病人 relax, 但要小心有沒有跟其他藥物或抗癌治療衝撞, 這些都是給大家的溫馨提示.

#圖文不符
#荷蘭Amsterdam滿街都是大麻味 #感覺迷幻

Reference
https://www.nd.gov.hk/pdf/CBD_Information_Note_English.pdf (《危險藥物條例》有關 CBD 的資料)

https://www.mdanderson.org/cancerwise/cbd-oil-and-cancer–9-things-to-know.h00-159306201.html (美國權威大型醫學機構有關 CBD 的見解以及建議)

 

黃麗珊醫生 臨床腫瘤科專科

保健產品一定保健?

經常發現, 有好多病人同時進食大量保健產品, 希望盡快病好或者更加健康, 其實這些保健產品是否只有益無害? 首先, 作為醫生嘅我一定唔會依賴保健產品, 因為每種保健產品都係一種藥, 雖然每一粒/包產品內的主要成分不是藥, 但卻有同樣有的賦形劑! 而且這些賦形劑的成分甚至很大機會超過主要成分, 這些都是很多人不清楚的!

什麼是賦形劑?
藥物/ 保健產品中通常以有效成分（active-ingredients）及非活性成分（inactive-ingredients）所組成，其中非活性成分又稱輔料（excipients，或稱賦形劑），一般是天然或合成物質 (可以是動物、植物、礦物、或化學合成)。它具有一飾多角的功能從而提升藥物中有效成分的作用:
1. 稀釋有效成分幫助胃部吸收
2. 幫助錠劑成型（錠衣）於胃部釋出有效成分
3. 粉末或非黏性物質來處理有效成分，維持藥物於有效期限內不會產生變化
4. 添加色素改善外觀
5. 調味劑添加口感或味道
6. 防腐劑

所以, 每食一粒保健產品, 其實已經食咗好多無關痛癢的成分!! 如果均衡飲食的話, 在香港這個發達的城市營養絕對不會欠奉, 為咗食對身體多餘的營養, 但食多咗化學物, 究竟係咪真係健康啲!!?? 而且, 這些無關痛癢的添加劑亦不是完全無副作用!! 越來越多數據顯示, 其實有很多人對這些添加劑有敏感反應, 所以有好多人所謂的無明腫毒其實可能是因為吃下這些保健產品引起的! 亦有些人因為有乳糖不耐症而對當中的乳糖成分有所反應, 繼而肚屙.

另外, 過分補充某些營養亦可能本末倒置! 過量綜合維他命而產生的急性中毒症狀主要包括噁心、嘔吐、肚瀉等腸胃方面的反應。而在眾多維他命的種類中，以A及D的潛藏中毒危機最大, 因為他們是脂溶性維他命, 並不迅速地從尿液中排出，部份更會被儲存在肝臟和脂肪組織，過量服用因而累積, 引致毒性反應, 曾經有小朋友維他命A中毒而需要換肝。至於水溶性維他命如B及C經身體吸收及同化後會從尿液排出, 不易積聚, 但過量型可以引起中毒症狀。

除了過分補充營養有機會中毒, 當中有效成分易有風險被汙染, 例如魚油丸有機會重金屬過高, 將來甚至要檢測是否輻射過高! 但是, 現行還未有法律規管保健產品如何達成質量保證, 這個絕對是隱憂.

其實保健食品市場龐大, 可以過億元, 利潤非常可觀, 保健產品不是藥物, 不需要受到衛生署監管, 與一般藥物發展不同, 藥廠需要投放超大量資源 (要經過一系列研究, 由實驗室細胞實驗開始, 老鼠研究然後再臨床研究, 要經歷第一階段第二階段及第三階段, 需時通常超過十年)來核實某些藥物是有用才能推出市場 (當中亦有不少失敗案例, 血本無歸), 所以開發保健食品本少利大!

如果是醫病需要, 當然需要用藥物, 同時亦要服下那些非活性成分, 這個是無可避免的, 因爲要保命. 但是,保健產品大部分美其名補充營養從而改善體質促進健康, 一般依照的數據是實驗室的數據, 再簡單一點來說, 就是我們西醫常說的不入流的數據, 因為人體博大精深, 某種成分對一粒細胞有用, 並不代表對個器官有用, 亦不等於對人有用!!!

之所以長篇大論係因為唔忍心見到大家食藥多過食飯, 以為有益實是無益! 其實, 健康從來冇捷徑, 不可以用錢買健康, 不可以食幾粒好貴的保健產品就可以抵消不良飲食習慣以及欠缺運動的禍害, 亦不是越貴越好! 地球其實真係好危險, 食天然食品又驚汙染, 食保健產品又幫唔到忙, 但是在這個地球內人人平等, 與其怨天尤人不如坐言起行, 好好為自己及家人在這個危險的地球內 “damage control” 即是以最小的傷害繼續開心地活下去, 大家一起努力!

Ref:
https://www.derc.org.hk/en/medic-world-detail.php?id=107
https://zh.wikipedia.org/wiki/賦形劑
https://www.nps.org.au/assets/03cccf6d672e3da1-9a8d5cf3163e-23fe0723d32447196d9902a781383c6f8ffb502d9958db960ba8e8bff0ad.pdf

#圖文不符
#人生總是充滿疑問

 

黃麗珊醫生 臨床腫瘤科專科

<<減肥唔成功 ，遺漏的一個要點>>

今朝巡房的時候有病房的姑娘， 無意中講到原來佢正在嘗試減肥。 我教佢試下用168的方法 ，但係講下講下我發覺佢唔係咁簡單。 佢話佢已經 不嬲食好少嘢 ，長期都唔係好好胃口 ( 其他同事也同意)，但係唔知點解唔食都肥。 其實呢個情況並唔罕見 ，我嘗試用中醫角度解釋畀佢聽，同埋有何解救方法。

跟住我問佢， 佢係咪好細個甚至係小學嘅時候都已經冇乜胃口食嘢， 而且食嘢食得好慢嗰種人。 佢話係 。佢話曾經讀大學嘅時候有人以為佢接近厭食嘅程度。 另外佢就鍾意食零食多過食正餐。 所以喺佢哋講， 其實從中醫角度相對簡單， 就係小時候的腸胃問題未解決 ，一路拖到而家成人仍然受同一問題困擾。

不少小朋友都有胃口差食嘢慢正餐近己都哽唔落嘅現象。 喺中醫角度睇呢其實呢個情況係唔正常的。 但的確不少人大左會自己好返。 即所謂outgrow the problem. 但有部分又問題纏繞青春期甚至成人階段， 變成長大以後長期都有腸胃問題。 喺中醫嚟講 損傷脾胃， 便會產生氣虛和痰濕， 兩者都會令到肌肉鬆弛 ，脂肪積聚，而且肌肉看起來很“透”， 毫無張力。 咁就可以解釋到點解唔係食好多嘢都會肥。

就呢位護士朋友的情況嚟講， 有兩個可能性。

一個 腸胃 積滯。 即係這個概念只是在中醫有。 大概就是 小時候因為飲食不節， 不斷食唔同種類嘅零食， 又或者是情緒影響， 又或者是 過量用抗生素等等問題。( 很多時 已經很難追番小時後點解會起初有這問題) 腸胃有積滯 在小朋友身上症狀較為明顯。 但其實在成人中也有。 症狀包括長期食少少就會覺得 肚脹， 胃有好多氣， 食少即飽。 大便可以有便秘又或者 肚瀉 兩樣都得 。兩者 亦可交替出現。 而且一般情緒較為忟憎。 長期積滯會生熱， 就可以表現為口氣重 和其他熱氣嘅徵象。 治療要用消滯除積的中藥， 例如山楂， 神曲等等 。 但注意一般因為積聚已久治療不可急於一時， 要慢慢復藥。 但一般一至兩個月便可以有明顯改善。 呢種病人千萬不要服用補品， 否則只會越食越差。

第二個可能性就係脾胃虛弱。 脾胃虛弱雖然吸收 較弱， 但另一方面所謂運化的功能也都弱。 亦即係話吸收了的營養身體不懂得正確利用運行全身， 只會堆積聚皮下成為脂肪。 即所謂脾虛濕重。 呢種人通常長期都覺得很攰 而且經常想睡覺。 治療方面和第一種情況剛剛相反， 要加一點點補益的中藥， 健脾益氣化濕。 好多人問點解我脾胃那麼虛弱呢？ 除咗多食生冷之外， 很多時就係 小朋友的時候 腸胃有問題沒有調理好。

所以治療方面最好就係是經過中醫診症作出適當嘅處方。 但因為今天筆者很忙沒有時間為呢位護士朋友診症。 但我卻叫他可以進食一些益生菌以改善腸胃， 這是一個簡單的方法。 另外戒除所有零食。 並且有心理準備開頭食益生菌的時候會有不少腸胃不適。 腸胃調節好後就可以另外配合運動 和減食糖份來減肥。 至於點解要用益生菌呢，下一期再講。

 

蘇子謙醫生 (臨床腫瘤專科)

<< 回應cuhk secrets 醫學生痛鬧考試文 + 自己讀和教medic的體會>>

話說琴晚睇咗一篇 放喺cuhk secrets 的文章 自由一位二年級醫學生, 應該是中大的。不斷通鬧考試唔合理同埋 讀書有差唔多130lectures 讀得好辛苦。 文中亦都講 發覺好多嘢都冇教要自己google。 呢一篇文變咗潮文 ，不少現職醫生留言。 不過我諗各位同學應該都係讀書讀得太辛苦， 喺網上呻一呻，其實大家又不需要太介懷。 讀過medic的，大家都試過讀書讀到將份notes鏈爛佢， 在掉落地，發洩憤怒後。最尾又係喺地下執返上枱面繼續讀。。。

不過文中有一些觀點都頗為有趣值得我係啲度討論下。 原文我不在這裏引述， 因為有太多粗口。

首先 我自己當然讀過醫學院，明白當中的痛苦。亦都考過不少專科試。 亦在醫學院任教， 雖然我唔知道中大的課程編排， 但是所謂130lectures 真係只不過小菜一碟。

其實讀醫真係一個考試行業。 入得讀醫嘅讀書本身已經好叻。 但入到去 個個都讀得咁辛苦， 以前什麼 dsc狀元ib狀元, 入到去考試都有機會唔合格補考兼留班， 都已經見怪不怪。 所以若然唔 頂不盡無窮無盡的考試， 千祈唔好讀醫。 畢竟世界上有更多更好的行業可以賺錢。 若然一心只為賺錢真的不要讀醫。 而且香港兩間醫學院 其實考試， 都會比其他一些海外醫學院難。( 個人睇法)。 其實不嬲讀乜嘢喺香港讀書都係辛苦過喺外國。 淨係講以前中學會考同英國會考 攞a的比率就知道。 所以若然要在香港讀醫就有定心理準備。 會比以前讀中學辛苦好多。 成日都有啲醫學生同我講話讀書好辛苦， 有無窮無盡的東西需要記憶。 問我有咩記憶的好方法。 我確實是有些竅門， 我之前在youtube度講過 今日喺度唔重複。

若然只計頭兩三年的基礎課程， 讀中醫畀讀西醫辛苦。 中醫除了一些基本的生物醫學課程， 還要死記硬背 幾百隻中藥， 黃帝內經條文， 傷寒論條文， 全身幾百個穴位。。。 所以什麼130lectures 實在是小巫見大巫。 其實現在我的記憶力 是在讀中醫時候訓練番嚟的。

文中講到有啲嘢好似冇用， 他用的例子是 human genomic project。 講到明 原本考試唔考 最後又會考。。。 文中提到他的憤怒。 中大的考試方法 我不太清楚， 但應該和港大的考試範圍沒有太大分別。 很多時考試的範圍並不會 只有lecture notes. 有一些題目是會建基於lecture note 以外 的小小延伸閱讀。 亦有部分題目 是考驗你對 該課題是否已經 貫徹 理解 從而能夠推敲答問題。 是不是只是考記憶力。 但一般這些較為深的題目 佔全卷的百分比可能只有兩三成。 所以若然這些題目答得不好也不會不合格。 你寫題目主要是分別哪些 理解力 和實力較強的學生， 可以給他們distinction。 因為若然 全部題目都是平鋪直敘簡單，那就分不了高下。 呢個是我們醫學院出題目的一個philosophy. 那位同學若然見到 一兩條非常難的題目實在不要擔心。

所以我都同自己交的學生分析講， 讀醫最緊要清楚明白自己的目標。 第一要明白99%嘅學生都會準時畢業成為醫生。 總之合格了便可以。 中間這五六年當中可能有些挫折， 要補考其實也無傷大雅。 很多出色的醫生以前考試 都有 肥佬的經驗。 而最後能夠每一科distinction 的學生 比例一般少於一成。 起碼在我讀書的時候是這樣。 以前一班130人每年考試 攞到distinction 只有少於十位。 現在好似港大比distinction已經鬆手了很多。 所以假如同學不是aim distinction。 其實用平常心讀就可以了不需要太大壓力。 始終超過九成的學生都是 攞一個pass, ( 醫學院沒有計grade or gpa). 又或者 假如對某一科目特別感興趣可以花多少少時間aim distinction. 咁樣 努力 集中做自己 最想好的科目就可以事半功倍。 始終將來做專科醫生的話也只會做一科。

同埋我之前都講過有時醫學院考試， 特別係clinical嗰幾年， 超過一半都係講運氣。 與其發曬癲咁樣讀， 不如有時借咗宗教的力量， 可以祈下禱 求上帝幫忙， 又或者念心經， 又 農曆新年去車公廟轉個風車等等( 按自己宗教而定)， 可能都會有不小的幫助。

另外各位學生又話考試溫習要成日google。 其實我不嬲都教啲學生讀書溫習要多用google。 上堂教嘅好多時都係一個大綱， 好多時都係自己上網睇返嚟的。 與其睇教科書不如用多啲網上嘅平台， 例如是UpToDate 或其他行內常用 內容的網站。 有時youtube 免費教學也非常好。 有一些很難見到的sign, 喺youtube度都會有。 我諗嗰位學生唔明白喺醫學院 或其他大學的教育 都只是畀你一個框架framework, 內容很多時都係你自己睇返嚟去fill up。 作為醫學院老師都只是喺適當嘅時候 啟發你嘅思維，點條路你行。 所以點解其實上tutorials 比上lecture更加重要。

另外有講到話大學畀四萬幾蚊學費好貴， 其實喺香港讀大學嘅學費20年都冇加價 ， 對比樓價升幅你就明)4 萬幾蚊一年雖然唔可以話係細數目， 但的確比世界很多地方都便宜。 再加上兩間本地醫學院 都有競爭 希望可以收取好成績的學生， 兩間醫學院都有不少入學獎學金 有不少醫學生讀曬幾年都係唔使畀學費。 假如你是在美國讀醫學院 ，讀完真係孭住一身債。 香港讀醫其實納稅人差唔多要津貼 每位醫學生200萬。 所以喺香港讀醫， 其實已經係攞咗一個很大的社會福利。 不要再怨吧。

另外於是不是有些科目真的是冇用呢？ 其實有時到你出嚟做嘢嘅時候， 調返轉頭睇先會覺得有用。 有時就算 讀書嘅時候發現有些東西真係好廢好浪費時間冇乜用， 你覺得很無理。 但其實將來你做實習醫生 又或者正式執業， 你會發覺 無理及 浪費 時間的東西更加多。 現在你所受的只是小巫見大。

我經常都鼓勵自己和其他醫學生，其實讀醫學院整個過程 和實習醫生有時真係好辛苦。 但係成個過程 就好似軍校一樣， 係鍛鍊一個人嘅意志。 和在各種壓迫之下人變得強壯。 若然你把所有 的這些關卡當作自己正式行醫前的訓練， 你每日會過得好一點。 你的心境決定了你的未來。

當然若然你感到medic不適合自己, 又或者讀完之後不想作醫生。 這無傷大雅不需介懷。

#睇完篇長文就執番份note繼續讀

蘇子謙醫生 (臨床腫瘤專科)