感冒發燒會死死氣睇醫生、唔想番工，射波會拿拿林睇醫生、長期病患者要Keep住見醫生…點都有一個睇開睇慣嘅醫生，開假紙都開得容易啲呀大佬！
兩年前，我係個少病痛嘅人，頂多係考試嘅時候，頭痛肚痛胃痛頸痛手痛腳指都痛。但考試一完，全部小病大痛就不藥而癒。正因如此，醫生係好日都唔睇～
但過去呢兩年，我幾乎每隔一至兩星期就要見見我親愛嘅李醫生，有時更加係個個星期見。我都講過啦，佢唔會主動同我講病情、點醫點醫⋯⋯…咁我係咪次次倒塔咁早番醫院，等兩三四個鐘，同醫生對望一眼就拂袖而去呢？
事實係佢更加關心我嘅心情、體會、成長。
老老竇竇，我肯定有Cancer嘅原因絕對離不開「內心唔放過自己」嘅諗法。做人嘛，有時候真係會好累。因為好多事你好唔願意做，但你不得不硬食。即使你再強，你能夠硬食幾耐？其實我地都只不過係人…
病前，我唔明白。我淨係知我要讀書讀得好，因為我想要Scholarship；我唔開心我唔會講出口（雖然塊面黑過屎），我會寧願自己死 頂，然後內心就不停諗不停諗，諗到天下荒地老！直到我意識到自己隨時會死…
我好能夠明白要放過自己一啲都唔容易，因為你性格係咁、因為事實係咁…無限嘅原因。但你需要做嘅只係嘗試一次！為身邊疼錫你嘅父母試一次、為愛護你嘅朋友試一次、為Better you 試一次。我敢講，一定值得！因為過後，你會發現自己豬仔到浪費咗好多時間。而呢啲時間其實可以俾你睇倒原來個天好大好闊、原來你嘅笑聲好好聽、原來私煙bb都幾靚（嘔）！
著起件綉左"Doctor" 嘅白袍、掛個名就可以係醫生嘅。但當佢能夠陪伴你走過艱難日子；提醒你病嘅時候，更值得敞開個心去讓心靈成長，佢先係好醫生！（係年青靚仔醫生就更好）
.jpg)
.jpg)