你好, 家人患了腎癌, 6月初已切除了右邊腎, 照PET-CT發現已擴散到盤骨及尾龍骨. 7月初開始食標把藥SUTENT, 服用了兩星期後開始有副作用如生菲之, 喉嚨爛致進食有點困難所以去了睇中醫舒緩.到8月頭SUTENT第一個療程完成, 中藥次數由每日兩次到每日三至四次後發現開始面部浮腫. 想請問: 致浮腫原因是因為腎臟不能消化中藥 / 有其他原因? 有什麼辦法可消腫? 謝謝!!
1. Sutent 嘅療程通常係食四個星期藥, 停兩個星期 為之一個療程, 常見嘅副作用包括口腔潰爛 和腸臟不適, 有時可能白血球低, 亦都會引致有生飛滋和口腔損嘅情況。 建議醫生覆診時,抽血檢驗白血球, 是否下一個療程要調較藥嘅份量。 另外一個方法是用低一個份量嘅Sutent, 連續六個星期進食, 有研究亦顯示成效一樣,而副作用有減少嘅情況。
2. 如出現喉嚨潰爛口腔損嘅情況,建議和醫生一起檢討, 是否需要調教藥量, 或者有沒有其他藥物可以舒緩嘅方法
3. 在服用標靶藥時, 要小心使用中藥, 一來避免加重腎臟和肝臟的負擔, 另外有些中藥會增加肝酵素嘅功能, 加速分解標靶藥, 令成效降低。 所以在服用中藥時, 一定要和腫瘤科醫生及中醫師商討, 研究同時服用兩種藥物是否有衝撞。
3. 面部浮腫常見嘅原因, 包括身體有過多的水, 但是如果因此原因, 腳步也會浮腫, 建議詳細找腫瘤科醫生評估身體和檢查。 如果因身體未能排出水份, 可以用一些去水藥物幫助, 但份量要小心調配以免影響腎臟功能。 第二個有積水嘅原因也可能是服用了標靶藥物後進食比之前減少, 令血蛋白下降, 導致有積水嘅情況, 抽血可以檢驗血蛋白嘅指數, 從而讓醫生作出評估。 另外一個較罕有嘅原因就係中藥裏面含有類固醇嘅成分, 所以服用中藥後會導致有面腫嘅情況。
4. 其實最重要不是找方法去消腫, 而是找出面腫嘅最主要原因對症下藥。 還有找出紓緩治療嘅方法去處理標靶藥物嘅副作用。 如果發現各種藥物和方法都未能舒緩Sutent 嘅副作用, 便需要和醫生商討是否用第二種嘅標靶藥控制病情。