癌症資訊網

文章

杏林專欄 > 臨床腫瘤專科 > 蘇子謙醫生 > <<中藥藥粉不如煲藥好??>>

<<中藥藥粉不如煲藥好??>>

21-08-2021

<<中藥藥粉不如煲藥好??>>

近來一位病人問我，佢話佢睇咗一個西醫，同佢講，濃縮中藥藥粉(以下簡稱藥粉)，其實根本冇用，因為傳統中醫根本全部都係煲藥。我聽到都覺得好奇怪，因為呢個係知其一不知其二的講法。咁究竟係藥粉好還是煲藥好呢？

首先傳統中藥的製劑絕對不止於湯藥，即係我哋平日講嘅藥材煲藥。其實傳統中藥嘅製劑有很多種常見的有散劑，丸劑，膏方等等。只不過我們香港一般傳統用煲藥比較多。其實不少傳統製出來的中成藥都不是煲藥但流傳多年仍然是有效的中藥。例如傳統中成藥有藿香正氣散，主要用嚟醫腸胃型的風寒感冒。又例如用嚟救急用的安宮牛黃丸( 而家已經抄到天價)，用來長期補身用的六味地黃丸，八味地黃丸等，就係丸劑。都是直接把藥材壓碎成末後再加入蜜糖，水，米糊等，製成藥丸。呢啲都係沒有經過煲藥呢一個過程的傳統有效中藥。所以嗰位醫生所講的並不是事實。

咁講反而家好多人用的濃縮中藥藥粉，究竟係點整出嚟㗎呢？其實呢一啲藥粉定唔係簡單將藥材磨成粉，而係透過高壓高溫煎煮藥材提取藥汁之後，將其能提煉出來的藥汁乾燥化，藥材的精華經提煉後便會製成顆粒或磨成粉狀。所以呢一些中藥其實有一定的濃縮度。每種藥材經過這種科學制法製成的就叫做單味。另外將一啲成方例如是補中益氣湯，溫膽湯等等的成分藥材一次過煮完之後整成顆粒的，就叫做複方藥粉。

自製造呢濃縮中藥的藥廠有很多間。絕大部分喺香港用的藥品都是經過所謂的GMP 嚴密生產過程，所以喺微生物，重金，屬和農藥方面都有嚴格控制。即使長食也是安全的。再加上衛生署有定期抽查以保安全。話說兩頭其實香港買到的絕大部分藥材都是有GMP 認證的，也有衛生署把關。所以即使香港的藥材也是非常安全，至緊要購買嘅時候到信譽良好的中醫師或中藥點到選購。

咁再講落去究竟用藥粉和煲藥有冇分別呢？其實從臨床療效睇嚟兩者冇明顯嘅分別。用藥粉有好處是方便攜帶，而且易於儲存。例如有些病人可能要把藥中午拿到公司度食，用煲藥就困難得多了。另外假如病人需要一個長期主方例如是一劑藥食兩星期甚至三星期。藥粉基本上放於乾爽的地方都沒有問題。但用完藥材的話最好真的搵一個較涼或者甚至放落雪櫃當中。否則在香港潮濕炎熱的天氣當中藥材就咁擺喺屋企一星期後可能會生蟲。有病人同我講，甚至試過打開藥材之後，有一隻隻蟲飛出嚟。。。另外特別癌症病人因為藥味多，所以一劑藥很大包如果要一次過哪兩星期基本上重到不得了。所以好多病人都要拉個喼去睇中醫。

不過另一方面有些時候藥材又可能比較好。例如買一些較為罕見的中藥，因為沒有藥廠製成藥品所以都要用返原藥材。又有一些人可能會覺得藥粉畀藥材更加難飲，所以寧願煲藥。另外也有病人同我講攞藥材見到成包藥，很有滿足感。。。

也有人曾經試過用化學光譜去睇同一條方經過煲藥出嚟嘅藥汁和藥分開出嚟嘅藥汁有沒有分別。發現原來兩者真係有分別。不過去深究呢一樣也沒有很大的臨床意義，至少喺臨床所見兩者同樣有效。

反而用藥粉或藥材都不是最主要嘅問題，最重要係藥物嘅質素。幾年前曾經有一個病人肺癌很嚴重覺得身體很疲累我叫他只係煲四隻中藥去提升一下免疫力。後來服食一星期之後佢覺得身體竟然越嚟越怕冷。我覺得很奇怪，因為當中有花旗參應該係可以補氣。冇理由越食越凍。後來我叫佢用同一條方去另一間藥店，指明要最貴嘅花旗參。藥費貴了八倍。但一星期後佢覺得氣力充足同埋手腳溫暖，而且冇得口乾的情況。由此可見藥材嘅質素先係最重要嘅關鍵。如果你去中藥店就算同一樣藥材例如北芪都有唔同嘅價錢同埋級數，功效絕對有唔同。如果你煮開飯鍾意自己買食材，你就會知道即使是同一條甘筍，唔同價錢唔同地方買出來的味道都可以相差很遠。中藥也是一樣。所以中藥著重地道藥材。

當然唔係話所有嘢都要用最貴嘅藥材，因為而家唔少中藥已經炒到天價。但要醫病找到優質安全和有療效的中藥，最為重要。無論是用藥材或者用藥品其實都冇所謂。

#蘇子謙
 #蘇子謙醫生
 #蘇子謙中醫師
 #中西醫說
 #中藥藥粉
 #中藥藥材
 #優質中藥