AXA安盛首席醫務總監、醫管局前總行政經理（質素及標準）邱家駿醫生，1993年中文大學醫學院畢業後，先在聯合醫院服務，2002年到瑪麗醫院深切治療部工作，在公立醫院做了17年臨床醫生，及後升任行政管理，盡顯領導才華。在醫管局工作了22年的他，2015年變身醫療集團執行醫務總監，再以營運總監身份成為港怡醫院的創院功臣。在公私營醫療界領軍多年、視野廣闊的邱醫生周身刀張張利、瓣瓣精，2019年加入保險界貢獻醫保。
AXA安盛首席醫務總監、醫管局前總行政經理（質素及標準）邱家駿醫生與《晴報》陳小芝分享在公私營醫療界工作的故事。（圖片：晴報）
相約邱醫生在AXA安盛總部舒適的員工中心暢談，眼前西裝筆挺的他，跟我在酒會場合上碰到的同樣親切，是一位給人高指數穩重感的「高管」。我好奇問：「你中學讀拔萃男書院，嗰時已經立志大學要讀醫？」
他答道：「喺我哋嗰個年代其實選擇唔多，以讀大學嚟計通常醫生、律師、工程師、會計師，科目嘅選擇好有限。工程師，我計數唔叻；律師，我說話又唔夠好，所以最後揀咗做醫生。」
對於大學選科，以至未來工作的抉擇，家庭和中學兩方面對其影響有多大？「中學同學乜人都有，影響唔大，反而家庭影響得我最大嘅係爺爺，我好尊敬佢。我考到（大學）醫科時第一時間話畀爺爺聽，佢當時喊。喊除咗因為開心，亦因為佢知道讀醫好辛苦，覺得個孫要捱好幾年。爺爺喊嘅另一個原因，因為佢做布匹絲綢生意，我話佢聽讀醫，即係我唔會承繼舖頭。」邱醫生父親的開明和支持，亦是他的一支高效強心針，「爸爸話我鍾意點就點，冇乜所謂，而我覺得每個人都唔應該受背景束縛，要揀自己嘅路去行。」
人生每行一步，都總會有些「因為．所以」。邱醫生選擇做醫生的理念是…「醫科面試，被問到點解想做醫生時，一定唔會有學生話我將來想做保險公司嘅醫務總監，個標準答案一定係我想幫人之類，我當時答得比較特別，我話：『如果我家人有病時，我會知道點樣處理』。」
妹妹患癌感無力 階段式學習面對死亡
約10年前，他的妹妹被肺癌奪走了生命。當時，雖然行醫經驗已經很豐富，亦見慣了生死，但當事情發生在自己家人的身上時，由醫生變成病人家屬的打擊絕非一般。他說：「當時我有幾個感受。第一，原來我做咗咁耐醫生，面對自己家人有癌症嘅時候，個腦會亂晒；第二，會發現喺治療過程入面，雖然跟足晒規矩同程序，但從家屬嘅角度去睇，會發覺有好多地方不足；第三，喺藥物方面，肺癌藥物價錢好昂貴，我都叫做好彩仲負擔得到，但唔少香港人未必負擔得起標靶治療同免疫治療嘅藥物，所以喺我妹妹過身、同埋我離開醫管局之後，我都有好多機會參與民間組織嘅癌症活動，對優化藥物及治療提供意見。」
妹妹的去世，讓一向專業、冷靜的邱醫生，第一身感受到病人家屬的無力感，「當時我身邊嘅同事唔太敢出聲，好記得當我第一次睇到妹妹張肺（X光）片時，我同一個心胸外科醫生講：『呢個一定係良性，唔係惡性嘅病嚟嘅』，嗰位同事睇咗片之後唔出聲，就話：『唔緊要啦，我哋都要攞組織去化驗』。若干年之後，該名醫生話我嗰時完全冇咗主意、冇咗準則，我只係想佢（腫瘤）良性，並唔係知道佢係良性。現在如果有朋友嘅家人患癌，我都會分享番自己嘅經歷。」
病人死亡，對於世上所有醫生來說，都是一種階段式學習，「每個醫生都會經過幾個階段，開初會好投入喺件事入面，所以病人過身呀、佢家屬喊呀你都可能會忍唔住。跟住慢慢你會變到好抽離，病人過咗身，病人對你嚟講可能變成一個Number、一個病症，完全出於一個自我保護嘅機制。再慢慢、慢慢達到一個平衡點，會知道能力有限，同理心要去到邊一度，而唔會過份投入事件當中。」
我問：「有冇見過零同理心或情緒過激兩大極端嘅醫生？」
他說：「有，就算我自己都去過呢兩個極端。」
他表示年青時的自己，曾經投入到動過真火，「記得我做深切治療部嘅時候，有次收咗一個十幾歲嘅男病人，佢因為心律不正突然昏迷，我哋幫佢搶救。佢父母年紀好大，超過70歲，每日由朝到晚坐喺深切治療部門口啲凳嗰度。我夜晚當值見到佢哋，於是勸兩老返屋企休息及等消息啦，點知原來佢哋冇手機，連屋企都冇電話。醫院夜晚好凍，兩老坐喺度好辛苦，所以我都會叫啲護士畀杯暖水呀、畀張毛氈佢哋呀咁。最後，好彩佢哋個仔救得番，亦都冇乜嘢後遺症，於是我哋送番後生仔上普通病房。隔咗一兩日後，我咁啱上去巡房，見到後生仔嘅父母餵緊佢食嘢，但呢個後生仔竟然用粗口鬧父母，內容好難入耳，我好嬲，加上我嗰時又後生啲啦，聽到我把幾火，一手就攞起個排版（病歷表）用力拍落枱鬧佢，一拍落去嗰下，全個病房靜晒，我乜都聽唔到，剩番啲機器聲『嘟…嘟…嘟』，個後生仔好驚，其實我自己都好驚。嗰次係我醫人生涯之中，唯一一次鬧病人，我真係從來未試過。亦都咁講，今日發生的話一定被人投訴。」
護士長見狀，立即跑過去替年青的邱醫生打圓場，這件事實在難以忘懷，後來他轉職行政成為了管理層，需要處理投訴事件時，但凡涉及醫生鬧病人這類個案，他都會坐下來和相關醫生分享自己的故事，「我成日話鬧人有兩個層面，你想對方記得一啲嘢、你想佢改變一啲嘢，就應該關埋房門去鬧；另一個鬧人嘅層面純綷為發洩情緒，但作為一個醫生，呢樣嘢一定唔應該。所以我嘅工作辛苦之處，未必一定喺工作上面，有時係情緒上面嘅管理。」
寫「萬言書」開啟行政之路
邱醫生的「上心」，亦從他寫給上司的「萬言書」中見一斑。
他說：「我喺深切治療部工作時，會見到好多醫院嘅黑暗面，例如畀錯藥、開刀時出現問題等等，呢啲病人最後去咗邊？其實都係去咗深切治療部。好記得當時有個病人半夜抽筋，我哋幫佢搶救，然後安排佢入深切治療部啦、抽骨髓啦、照電腦素描啦，搞咗足足成晚，到病人情況穩定之後，已經係朝頭早六點幾。如果我去瞓覺，我驚一陣間巡房唔知醒，於是就捉咗個年青醫生去飲咖啡傾偈。言談間講到點解個病人會抽筋嘅呢，其實抽筋唔係因為佢有呢個病，而係一連串醫療失誤引致。病人本身食緊一隻血壓藥，但隻藥會令到身體鹽份改變得好大，佢去睇街症時已經幫佢改咗藥，但入院時又冇留意，又開番第一隻藥畀佢。加上做手術要空肚，空肚又會吊鹽水、吊葡萄糖水，再加上佢係『執雞手術』，有空檔先攝入去做，佢一路都『執唔到雞』，一路喺度等，於是佢吊咗好多葡萄糖水，搞到身體嘅電解質指數唔穩定，中間仲有人幫佢抽過血，血嘅報告又冇人睇到，於是搞搞下去到半夜就抽筋嘞。」
事件發生後，邱醫生認為流程和溝通上必須有所改變，於是便寫了一份詳盡的建議書給部門主管，「部門主管睇完之後，就話：『嗯，都寫得幾好吖，你不如畀院長睇啦！』咁我又將建議書電郵畀院長，院長睇完之後，就話都幾好吖，你不如電郵醫管局行政總裁啦，當時係蘇利民，咁我又Send咗畀蘇利民睇。又隔咗兩日，佢嘅秘書就回覆我『多謝！』然後再冇下文。呢件事之後大概半年左右，香港政府開始推動『醫院認證』，瑪麗醫院係其中一間參與先導計劃嘅醫院，當時院長記得好似有個人好多事嗰喎，不如就叫佢做啦，我就係咁樣開始轉做行政工作。」
前線救人、行政領軍，在醫管局工作了22年的邱醫生別有一番體會，「喺公營醫療體系做行政，就好似一個好大機器入面嘅齒輪，好處係大家同一個目標一齊去做，唔好處係咩？如果你諗清楚啲，上面會棘住你，下面亦會棘住你，當如果你嘅諗法比人行前啲，或者想做一件大啲、唔同啲嘅事，咁你喺呢個體系入面就會覺得有好多制肘嘞，呢個係驅使我後來離開公營醫療體系嘅部份原因。」
為病人保單出力：首要以風險為本
作為醫管局的「明日之星」，邱醫生怎樣說服自己跳出Comfort Zone，接受私營機構的工作邀請？他說：「我冇諗咁多嗰喎，唔會去諗如果唔走又會點點點，我離開又會點點點，我成日覺得但凡諗得耐，就會留番喺度。英文有句話opportunity presents itself，當有個機會嚟嘅時候，又覺得自己第一有能力，第二有魄力，最重要係第三有體力，就不妨試下去闖新嘅路。」
加入保險業，成為首席醫務總監的他，每天都為病人的保單出力，「任何情況之下，我哋都要：第一要『風險為本』 — 購買保單時，自己冇病冇痛又後生就最好啦，但如果本身有疾病，最極端例子生Cancer、有嚴重心臟病等等，通常買唔到（保險）。有好多人有病，但又未必嚴重到會死嘅，咁呢啲人點去做風險評估呢？令到佢哋可以得到保障，同時唔會令保險公司蒙受不必要損失，中間牽涉到好多醫學嘅知識，呢啲就係我其中一個好重要嘅工作。第二要『對客公平』— 買咗保險，最緊要賠得準確。醫學發展一日千里，好多條款可能已經喺10年前、20年前寫落，點樣去解釋個條款，純綷從字面去解釋，還是用現代嘅醫療科技去解釋呢？最簡單，例如20年前都未有免疫治療，都未必有標靶治療，呢類藥物用番三十年前嘅保險條款，要點樣去解釋呢？仲有『時間』，假設一個做咗膽手術嘅普通病人，保險公司要用6個禮拜去賠償畀佢，叫做合理啦，但一個癌症病人，可能每個月用緊6萬、7萬蚊，賠償如果唔夠快，就好影響佢嘅治療，人哋已經有Cancer，仲要日日去計算用錢，真係好辛苦。我哋現在盡量希望做得好啲啦！」
邱醫生指近年「帶病投保」的個案多了，病患年輕化，30幾歲的人也可能膽固醇超標、也可能患有慢性疾病，要完完全全健康才能投保接近沒可能，「如果投保人士有啲病嘅時候，長遠風險應該點樣計算呢，當然我哋有精算師幫手啦，但醫學上嘅邏輯要點樣同個精算師去傾呢，亦都係我哋嘅工作。」
講到工作，邱醫生的工作如同一面鏡子，他最清楚香港人大大小小的「保單」、林林總總的病患。我們最大的「敵人」到底是甚麼病？
「如果從臨床嘅角度，一定係癌症同心臟病嗰一類，有啲係你冇辦法去控制嘅，有啲改變生活習慣、例如唔吸煙唔飲酒可以幫助到少少，我反而覺得好多時最大嘅問題係拖延診治，呢個唔單只保險嘅範疇見到，過往我喺醫院做嘅時候已經發現，所以我做醫生嘅時候，有一句說話我一定唔會講，就係問病人：『點解你咁遲先嚟睇我？』其實好多人唔係唔知道自己有病，但喺公立醫院睇醫生，早上抽血、晏晝睇門診、再等攞藥，真係要預全日、冇一日都搞咗你半日，香港又真係有好多人手停口停，或者公司唔容許佢攞病假，所以延遲睇病，未必係個病人諱疾忌醫，好多時係個客觀環境上做唔到。另一個原因係錢，我嘅工作崗位其中一個特別嘅地方，就係會睇到唔同醫生、唔同醫院嘅收費，見到好多私營醫療體系的確好貴，好多人一諗到有藥都冇錢醫，自自然就拖延。」
在醫管局工作了22年後，邱醫生跳出Comfort Zone到私營機構工作。（圖片：晴報）
有感新冠反思健康 分享生活態度
說到底，一切從預防開始，邱醫生勸勉每一位《晴報》讀者愛惜身體，「呢一樣嘢連我自己都未必做到。我以前做臨床醫生時亦同時會做研究，夜晚要喺醫院當值，同埋有好多機會去外國講書。有時朝頭早瞓醒，我都要諗一諗自己呢一刻喺屋企吖、喺醫院吖定係喺酒店。到離開公營醫療體系之後，好多時一個星期有5、6晚業務應酬，都未必係一個健康嘅生活。有時睇番轉頭，新冠肺炎有一段時間暫停咗呢啲活動，令大家反思其實係咪需要咁多應酬呢，我有問過自己呢個問題，發覺真係唔需要。新冠過後，我刻意減少應酬，對自己身體好啲，但新冠期間在家工作，當時過咗一個星期我已經覺得唔對路，因為連行嘅機會都冇，日日困喺間屋度，係要做多啲運動嘅，起碼由基本做起行多啲啦。新冠肺炎有個機會畀大家去反思健康問題。」
邱醫生凡事「上心」，接到保險中介同事Case時，要求同事盡快研究資料及答覆查詢。他經常對同事說：「對你嚟講可能只係一個Case，但對中介同事嚟講係一張單、一個生意機會，甚至係佢成個月唯一一張單，得同唔得，都要盡快提供答案。」這一邊廂盡快，但另一方面他卻支持大家Hea，「心態上面，而家好多人都講Hea，其實Hea都唔係一件壞事，但有一個先決條件，就係你個Hea唔好影響到其他人，例如好似我自己去旅行咁，我都Hea㗎，唔會特別去編行程，但工作上就唔可以Hea到影響工作流程，大家係一個團隊。」
他分享給大家的養生錦囊就是 — 平淡不是壞事！
「生活唔一定要多姿多采，平淡係養生嘅最基本。除咗飲食、運動之外，心態都好重要。講到保險，保險係一樣好長時間嘅嘢，買咗就會擺埋一邊，唔好彩先至攞出嚟用，我覺得大家定時要睇番，起碼知道自己嘅保障內容，因為隨住時間，保障嘅要求內容可能已經唔同咗，後生時候，同你結咗婚、有小朋友所要求嘅嘢已經唔同。」
邱醫生寄語《晴報》讀者：「平淡係養生嘅最基本。」（圖片：晴報）
文章來源：https://skypost.ulifestyle.com.hk/article/3652610/晴報VIP-邱家駿醫管局工作22年-3大原因決定外闖-癌病者日日計住用錢好辛苦
