知情同意(informed consent)

文章

杏林專欄 > 外科 > 黎逸玲醫生 > 知情同意(informed consent)

知情同意(informed consent)

24-02-2023

電影《給十九歲的我》嘅公關災難簡直喺知情同意(informed consent)嘅最佳反面教材。

用外科醫生嘅日常工作來做例子。

首先，如果醫生無解釋清楚比病人知點解要做手術、手術有咩風險、有無其他可行的治療選擇，只係叫病人求其「潦隻龜」，而他日手術過程中有過失，醫生都唔能夠用病人簽咗名既同意書做護身符，因為一開始張同意書已經無效。

另一情景：病人胃出血，聽完醫生解釋後接受建議簽咗胃鏡同意書。然後去到鏡房（內窺鏡中心）訓咗上手術床，病人突然話：「唔得呀，好驚呀，醫生我唔做胃鏡啦，死都唔做呀我！」（以前係公立醫院都時有發生）呢個時候，醫生唔能夠話：「喂你頭先簽咗同意書架喎，無得反口！你要負法律責任！」我哋只可以氹、循循善誘，病人最後一刻say no，其實我哋都唔可以違反病人意願。當然，做胃鏡喺當刻最好嘅治療方案，但只要病人清楚理解做同唔做嘅風險，醫生唔能以「我係為你好」呢種「用愛浸死你」嘅出發點、或者「我哋成班醫生姑娘為咗你頻撲咗成朝已經好辛苦喇」呢種情緒勒索嘅原因而迫佢做。病人拒絕做胃鏡嘅原因可以好多：驚、有陰影、宗教信仰… 諸如此類。就算醫生幾唔理解、或者覺得個原因幾咁騎哩都好，同樣道理，只要病人清楚理解唔做胃鏡所帶來嘅風險，醫生都要尊重病人意願。當然，如果醫生質疑病人嘅精神行為能力，咁成件事就唔同講法，可能需要精神科醫生嘅介入同評估。

如果病人簽咗同意書做胃出血止血手術，手術其間意外發現病人卵巢有個腫瘤，咁醫生又可唔可以同時間切咗佢呢？答案喺唔得！同意書本身只包括胃出血有關嘅手術步驟，並唔喺一個全身麻醉手術嘅無限延伸，醫生唔可以「自把自為」代病人決定其他非即時致命病情嘅醫學治療。

有時候（尤其喺大學醫院），病人有機會被邀請參加新藥研究，研究單位絕對需要向研究對象清楚交代研究嘅主題、方法、可能出現嘅風險、未來研究成果可能用咩形式發佈、同埋被研究者嘅基本權利（包括可以自由決定參唔參加、隨時有權利退出研究等等）。如果病人最後決定唔參與研究，醫護人員亦唔可以懲罰性對病人只提供次一等嘅治療。

法律上，同意書(consent form)並非合約(contract)，無論喺條款細節、約束力層面上都有好大差距。病人臨門一腳縮沙唔做手術會唔會被醫生告？遊客去玩笨豬跳簽完「生死狀」最後驚得滯想放棄要唔要巨額賠償？小學家長簽咗通告同意小朋友跟學校去旅行最後小朋友病咗去唔到又要唔要負法律責任？正如《毒舌大狀》入面黃子華話：common sense!

其實知情同意仲有一個重要元素係：簽署者需要喺完全自願、無任何外在壓力嘅情況下去簽份同意書。換句話說，雙方應該處於一個（權力）平等嘅情況。醫生不能夠用醫學權威嘅角色去迫使病人同意做手術，正如校方不能夠用權力去強迫學生參加課外活動。不過，讀過中學嘅你哋都知，學校總有辦法令你「自願」參加，例如關心吓你關心吓家長。事實上，明明病人唔想做手術，但屋企人用無限嘅愛同眼淚去令病人屈服同妥協做手術嘅情況屢見不鮮。作為醫生，你覺得病人算唔算自願簽同意書？你又會唔會因此推翻病人嘅決定唔同佢做手術呢？

（圖片來源：Golden Scene Facebook)

黎逸玲醫生醫生讀法律醫學倫理與法律知情同意給十九歲的我同意書合約手術同意書

城中活動

2026-06-15 7:00 下午【中醫講座】未病先防｜中醫教你為家人守住健康防線

2026-06-13 3:30 下午有人共鳴—— 一個很小、很溫柔的喪親分享聚會

2026-06-12 7:00 下午【線上講座】家支援醫事講・老年腫瘤學新視角

疑難排解

我們有一群專業的醫護人員及相關朋友，隨時解答大家的疑難，立即提交疑問！

按此問問題

會員註冊

成為會員，可以第一時間接收由病患者和照顧者角度出發的資訊，立即行動！

按此註冊

或許你會想看

2025-4-28 AI 對肺癌防治有用嗎？聽聽這些專家怎麼說！