醫生醫生我好亂啊! 個個講嘅嘢都唔同, 我應該信邊個好?

文章

杏林專欄 > 臨床腫瘤專科 > 黃麗珊醫生 > 醫生醫生我好亂啊! 個個講嘅嘢都唔同, 我應該信邊個好?

醫生醫生我好亂啊! 個個講嘅嘢都唔同, 我應該信邊個好?

13-03-2021

醫生醫生我好亂啊! 個個講嘅嘢都唔同, 我應該信邊個好?

一旦確診癌症, 就好像世界末日一樣, 一方面要消化負面消息, 調整心情, 另一方面要積極治療希望早日康復, 同時亦要為自己,為家人,為工作作下一步打算, 每一分每一秒都喺度諗緊嘢, 所以好希望可以盡快解決呢件事, 盡快過返啲平安嘅生活.

現在網上資訊發達, 好容易俾人一種感覺要清楚一件事, 只要上網瘋狂搜查就可以有一個假象覺得自己真係完全了解, 如果本著一個心態要尋求最好但係冇乜副作用嘅治療的話, 思想路徑以及行為模式都很容易俾人利用……尤其是當你要在極短嘅時間而又身心俱疲的狀態下尋求解決嘅方案, 幾咁精明嘅人都會喪失理智.

每個人嘅病情唔同, 對治療嘅反應唔同, 每個病人身邊嘅支援亦都有唔同, 而且, 即使是同一個病, 即使是治療嘅方法相同亦會有不同的效果. 有些病人即使沒有接受治療惡化的速度也可以比正在接受治療的病人慢, 究竟這些情況是因為治療的反效果, 或是另外的病人本身病程緩慢, 當中如何得出結論, 每個人眼中見到嘅嘢會因為自身嘅遭遇而演繹有所不同, 所以即使是一件事, 病人及家人嘅感覺與醫生嘅睇法會有些出入, 原因是病人沒有足夠的醫學訓練, 倚靠網上不盡不實的資訊, 以及身邊沒有醫學背景的朋友的道聽途說, 就會出現這個觀點與角度的問題, 引起不必要的誤會.

首先, 地球上尚未有治癌的仙丹! 大家都正在努力尋求的自治療成效機會率比較高, 副作用比較低的方案, 希望在可以承受副作用的大前提底下, 盡量根治/ 控制癌症, 從而改善病人的生活質素, 希望大家可以盡量正常地過日子. 由於治療嘅選擇眾多, 西醫, 中醫, 自然療法……即使是西醫, 如果見唔同嘅醫生亦可以有不同的建議, 所以總是令病人及家人覺得非常混亂, 覺得唔知信得邊個好, 感覺有如在賭台上賭一鋪, 如果賭輸咗就會遺憾終身, 因為感覺有如輸身家.

要解決嚴重嘅健康問題, 用科學及數統嘅方式往往能夠提升這個情況上的贏面. 因為,解決健康問題從來不是單純賭博, 是一場戰爭，懂得調兵遣將才能增加勝算! 醫學從來都是極深嘅學問, 由實驗室到臨床研究抽絲剝繭來作出定論, 排除每一個結論/ 每一個醫學建議嘅發生並不是撞彩, 不是偶然發生出來的. 要瞭解醫學數據, 尤其是臨床應用絕對不是單靠 Google可以瞭解到……因為, 即使是一般有科學背景的人, 也可能以為自己所瞭解的科學就是醫學, 自己斷章取義亦未能自我發現……, 醫學不是單純科學, 不是只是停留實驗室的層面, 不是停留在老鼠實驗的層面, “臨床應用”是另一個層次, 所以大家要小心! 要知道, 在網絡世界, 只要你能夠 Vocal, Presentable……你就是專家! 網絡上的專家! 但不是醫學權威的專家, that’s the difference!

絕對明白病人及家人焦急的心情, 不忍心見到病人受苦, 所以這篇文章絕對不是遊說大家只信西醫, 只想抒發一下所見所聞的感受. 在舒緩病房之內, 不難發現即使是接受非西方醫學治療, 病情並不是大家想象的收到控制, 而且到了病人最後期的時候, 身體最不適的時候, 往往都是在醫院裏接受照顧, 並不是他們所相信的學者能夠照顧他們, 這些情況又有多少人知道? 這些病人, 又有多少個能有氣力和心情在網上暢所欲言, 跟其他人談論他們所受的苦呢? 與其在傷口上灑鹽, 倒不如專心幫病人如何舒服點吧!