文章
杏林專欄. > 外科 > 馬國權醫生 > 乳癌補骨針-醫生不曾告訴你的三大妙用

乳癌補骨針-醫生不曾告訴你的三大妙用

03-06-2019

乳癌補骨針-醫生不曾告訴你的三大妙用

Posted by  in Bone Targeted Agent 補骨針

成日聽乳癌病友講「我要打骨針」先發覺,你又要打骨針佢又要打骨針,點解我醫生冇叫我打㗎呢?究竟乳癌補骨針係咩東東?我又洗唔洗打?今次教你「乳癌補骨針-醫生不曾告訴你的三大妙用」,唔好錯過可能救返你一命的補骨針⋯⋯

 

乳癌補骨針是什麼?
叫得做補骨針,顧名思義,就係補補D骨。我地希望透過呢D針藥,強化返D骨骼。

乳癌補骨針三大妙用
「咁乳癌點解要補補D骨?」

 

乳癌病友有兩個情況D骨會弱咗:

1)乳癌骨擴散:D癌細胞去咗骨,自然會慢慢侵蝕D骨,引起骨痛、骨折、同血鈣過高等三大問題。唔好睇輕呢D併發症,好多時骨痛慘過走,血鈣過高亦可以有生命危險。
2)骨質疏鬆[本身已經骨質疏鬆,或者收經後食 抗荷爾蒙新藥環芳香抑制劑Aromatase inhibitor)]:本身收經後D骨質已經加速流失,即係平時年紀大女性的骨質疏鬆,而家再食埋抗荷爾蒙新藥,佢嘅副作用係搞到骨質疏鬆,即係雪上加霜,鬆上加鬆。

「上面都係兩大情況D骨會弱咗姐,咁又話三大妙用?」

原來骨針仲有一個秘密用法,就係減少復發、延長乳癌患者壽命

「減少復發?延長壽命咁正!?!」

你冇聽錯,經過多年研究,我地開始發覺有某類乳癌病人用咗zometa係長命咗。(Denosumab暫時2019年都仲未有證據有呢個妙用。下面會詳細D介紹咩係zometa?咩係denosumab?暫且唔好理個名住)

「快D講我聽邊類乳癌病人得益,睇下我又啱唔啱洗?」

要收經後(人為收經都計)同埋早期高危復發(可以粗略理解為要化療)嘅乳癌病人,大概有2-3%整體存活率(overall survival)的增長。
未收經或者晚期嘅乳癌患者係冇呢種效果。

呢三個情況就係副標題所指的乳癌補骨針三大妙用。

 

「咁我都真係要補補D骨喎!可唔可以教我地點補法?」

乳癌補骨針種類

叫得做補骨針,即係針劑黎嘅(成效好過口服藥),而針劑之中,最大路最常見的有兩個選項:

1)Zoledronic acid(Zometa)唑來膦酸

呢款係最歷史悠久嘅藥之一,悠久到專利權都過埋期,所以已經平咗好多,由以前正廠二千幾一針,已經大幅降價到副廠二百蚊一針。佢係以吊針形式落藥(吊三十分鐘以上),所以一般好似化療咁喺日間中心吊,或者私家腫瘤科醫生診所吊。由於佢要睇住個腎功能去調較劑量,所以事前要抽血去驗腎功能。

(同類的雙磷酸(bisphosphonate)吊針以前仲有隻pamidronate,因為當其時zometa仲係好貴,有人因為經濟原因而退而求其次選用pamidronate,而家zometa平咗咁多,pamidronate 可視為被淘汰,所以唔浪費你時間唔講喇)

2)Denosumab (Xgeva適治華/Prolia博力加)地舒單抗

呢款就係新D成效好D嘅針藥,方便好多,打肚皮㗎姐,即係幾秒已經完成,對打完化療冇晒血管嘅病友尤其吸引。另外由於佢係固定劑量,所以事前係唔洗抽血驗腎功能。至於價錢方面,公立醫院Xgeva就三千七百蚊一針,私家就梗係貴D。

 

不嬲呢D藥要自費,不過睇新聞,好似由2019年4月開始,醫管局將佢納入咗藥物名冊,由以往的自費藥物變成專用藥物,至於邊D人要錢邊D人唔洗錢,就靠你地探子喺下面留言回報,始終我已經離開咗公營系統一段時間,政策嘅野唔夠你地update。

圖片來源:蘋果日報

 

另外Xgeva適治華,香港乳癌基金會係有一個100人名額的資助計劃,詳情自己睇https://www.hkbcf.org/zh/patient_support/main/229/

或者聖雅各福群會惠澤社區藥房都有頭一年,每針$1300資助,詳情自己睇https://charityservices.sjs.org.hk/uploads/diana/單張/腫瘤科藥物資助單張/XGEVA_SJS_Leaflet_170921a_FINAL.pdf

 

「咁邊一款有效D?」

簡單D講,就係頭兩個用法Denosumab有效D,唔係點賣你咁貴。

在於用喺骨擴散的情況,Denosumab 相比起Zometa,更有效減少乳癌骨轉移引致嘅併發症(骨痛、骨折、同血鈣過高)。

至於用喺骨質疏鬆的情況,Denosumab喺增加脊骨骨質密度方面亦都好少少。

 

「咁Denosumab有效D,點解仲有人揀Zometa?」

主要都係性價比,你睇埋下面幾耐打一次就會發覺,每個月打正廠Denosumab,同每三個月打副廠Zometa,個成本可以差天共地,現實社會唔係人人都可以不計成本追求質素。

另外如果用喺第三妙用延長壽命方面,zometa D數據係成熟D,Denosumab 仲係比較新,冇一D成熟數據去支持咁用法。

 

補骨針多久打一次

「咁要幾耐打一次骨針?打幾耐?」

好視乎邊隻藥同咩原因打:

1)乳癌骨擴散

A)Zometa:傳統係每個月打一次4mg,近年有數據話三個月打一次效果差不多。所以而家會視乎一開始骨擴散嚴唔嚴重同埋係咪痛得好厲害。如果骨擴散嚴重或者痛得好厲害,每個月打直到9個月後,如果情況穩定落黎,就轉每三個月打,無限打。如果骨擴散唔嚴重同埋又唔係好痛,就每三個月打,無限打。
B)Denosumab:120mg (Xgeva)每個月打,無限打。暫時冇數據支持打疏D。

「要無限打咁誇張?」

係咁誇張,因為乳癌骨擴散即使打緊時出現骨折都好,繼續打係有效推遲之後的骨折,所以要繼續打。另外有數據話去到臨走都值得繼續打,因為補骨針有效減低骨痛,等呢段路唔好走得咁辛苦。當然去到某D位,打開zometa的,可以考慮upgrade去denosumab。

2)骨質疏鬆

A)Zometa:本身骨質疏鬆的每一年一針5mg,打三至六年。如果骨質疏鬆係因為抗荷爾蒙藥AI的話,每半年打4mg,打五年。
B)Denosumab:60mg (Prolia)每半年一針,無限打(暫時見到用上十年都仲係有效果)。

3)延長壽命

暫時數據都係支持用zometa,通常每6個月一針4mg,用三至五年。

 

打補骨針有冇副作用

「咁打補骨針有冇副作用㗎?」

常見易處理嘅有血鈣過低,食返D鈣片搞掂。所以如果冇腎石底的,一般醫生都會建議食埋鈣片同維他命D補充劑去預防呢個問題。

唔常見但嚴重嘅有下顎骨壞死(osteonecrosis of jaw),頭一年大概0.7-1.4%度,多過一年就2-3.4%度(呢度D數據係講緊乳癌骨擴散用法,如果用喺骨質疏鬆度,由於劑量輕好多頻率疏好多,個數字會低好多)。由於整牙會增加呢個風險幾倍,所以醫生會叫你開針前搵咗牙醫睇睇先,處理好牙齒問題先開始

 

結語

當你清楚了解到乳癌補骨針的三大妙用、幾時打、點樣打、同有咩副作用,以後就唔洗聽到「我要打骨針」時感到一頭霧水,佢往往係幫你舒緩骨擴散病徵、預防骨質疏鬆發生、同埋救你一命的好朋友。如果想幫手救人,就幫我share篇文出去,介紹呢個好朋友比有需要的朋友識。下次再有好野同你分享時再見,byebye。

 

馬國權醫生
香港乳癌及乳病治療中心
外科專科醫生

城中活動

2022-12-15 11:00 上午 花藝班聖誕篇
2022-12-15 9:30 上午 中國傳統文化導賞團

疑難排解

會員註冊


或許你會想看
甲狀腺癌患者也可以吃紫菜
一對中年夫婦前來覆診,太太患有第二期甲狀腺癌,筆者替她進行了全甲狀腺切除和中央區頸淋巴清除手術。手術後病人康復 […]
癌症病人在治療期間可以吸煙嗎?
癌症是香港的頭號殺手,在每年導致將近三分之一的死亡個案。研究顯示吸煙是癌症的首要風險因素,吸煙人士的患癌機會比 […]
精準對付HER2乳癌 提升療效助改善生活質素
乳癌是本港的頭號女性癌症,每14位婦女便有1人最終會患病1,而在2019年已有逾4700宗新症2。幸而隨著癌症 […]
化療期間甚麼時候是運動的最佳時機?
香港大學內外全科醫學士5年級生 嚴浩民 眾所周知,運動有益身心,但是不少癌症病人在治療期間都會有虛弱無力、肌肉 […]
甲狀腺癌患者越年輕越好?
常說年輕的癌症患者的腫瘤都比較「惡搞」,一是因為家族基因遺傳的個案佔比較多,二是因為年輕人工作忙、忽視病徵,往 […]
乳癌病人飲乜奶好?
奶類製品的分類: 大家可能不太清楚,鮮牛奶才是由牛直接製造出來,其他都是統稱為奶類飲品或是再做奶 根據1977 […]
乳癌病人可否吃零食? (2)
乳癌病人是否要避忌生冷嘢? 是否可以吃壽司? 對於正在接受荷爾蒙治療的乳癌病人來說,由於經常受到潮熱困擾,偏涼 […]
乳癌病人可否吃零食? (1)
癌症病人唔可以吃糖? 坊間經常流傳癌症病人“一粒糖都唔掂得”,因為糖分會養大腫瘤,令腫瘤惡化或者會令腫瘤復發! […]
癌症資訊網專欄| 拆解乳癌五大謬誤
謬誤一:只有女性才會患上乳癌? 的而且確,大部分乳癌發生在女性身上,然而男性同樣有乳腺組織,故乳癌仍可發生在男 […]
癌症資訊網專欄|認識大腸癌成因及治療
大腸癌是本港第二大常見癌症,大約一半的大腸癌患者在確診時已屬第三期或以上,屆時痊癒率已跌至7成左右。由於大腸癌 […]
慢性淋巴細胞白血病患者的佳音 新一代口服標靶藥增加治療選擇
慢性淋巴細胞白血病是血癌的一種,在本港不算常見,並因為生長及進展速度較慢,部分早期病人可以只觀察而毋須醫治,直 […]
【冬陽天地】乳癌 | 梁冬陽醫生
  粉紅色10月是乳癌關注月,香港很多的非政府機構、商舖、傳媒都有一些活動令大家關注乳房的健康。 最 […]