一個大量失血嘅病人係咪唔可以俾水佢飲?

文章

杏林專欄 > 外科 > 黎逸玲醫生 > 一個大量失血嘅病人係咪唔可以俾水佢飲?

一個大量失血嘅病人係咪唔可以俾水佢飲?

24-02-2023

唔知大家睇咗《毒舌大狀》未呢？戲入面有一個非常有趣嘅醫學問題：一個大量失血嘅病人係咪唔可以俾水佢飲？飲完會死得快啲？

創傷病人(trauma patients)嗌口渴其實屬於正常生理現象。當身體受傷大量出血，體內平衡機制會立即分泌大量腎上腺素，令到非重要器官（包括消化系統、四肢、腎臟）嘅血管急劇收縮，從而迫使血液集中流向腦部和心臟。當呢啲非重要器官出現缺血情況，就會向大腦求救，而大腦就會經腦下垂體發出命令要補充水份填補血管內容量，所以病人就會覺得口渴想飲水。

既然傷者要補充水份咁點解又唔好俾水佢飲呢？首先，大量失血嘅病人大多處於意識模糊狀態，吞嚥能力變弱，呢個時候飲水極大機會會嗆到，過多水份誤入氣管會導致吸入性肺炎(aspiration pneumonia)、窒息、之後併發呼吸衰竭甚至死亡。再者，傷者送院後理應需要進行全身麻醉緊急手術，若果胃部充滿食物或水份，就會容易嘔吐增加吸入性肺炎嘅風險，咁亦都解釋咗點解大家平時做手術前都要禁食六個鐘或以上。大家千祈唔好睇小吸入性肺炎，呢個係死亡率非常高嘅病症！

=== 以下含有少量劇透 ===

電影入面有關Elsa死因嘅說法係被鐘京頤灌飲大量蒸餾水去「溝稀」血液濃度致死。從創傷學角度睇，有關血液被稀釋嘅學術討論主要圍繞靜脈輸液，而非飲唔飲得水。大量失血嘅病人送院後要盡快輸予一定比例嘅紅血球、血小板同血漿(massive transfusion protocol) 務求迅速補充血細胞去輸送氧份同營養去各個器官、同時避免因過度稀釋而影響凝血功能，所以醫生唔可以只係靠生理溶液去幫病人進行復甦急救。

其實曾潔兒只係行開咗兩分鐘去打999，鐘京頤就灌到Elsa飲晒一公升蒸餾水再掉埋個樽，我絕對有理由相信Elsa會濁親仲要濁到爆，因此佢嘅死因應該喺吸入性肺炎或者腦出血機會比較大。當鐘京頤喺庭上聽到林涼水嘅指控之後O咗咀，佢心裏面應該係：「吓？我想濁瓜個女者，無諗過要溝稀佢啲血喎！」。不過你想像吓如果改咗林涼水喺庭上嘅對白，成件事就即時變得無咁型！作為一套賀歲法庭（科幻）片而非醫療學術片，我唯有本著「睇故就唔好駁故」嘅心態，但又真係好多朋友同病人都有相同疑問，所以決定係度寫少少咁啦⋯⋯

（圖片來源：網上劇照）

黎逸玲醫生大量出血復甦急救大量出血飲水毒舌大壯創傷學吸入性肺炎手術前禁食

城中活動

2026-06-15 7:00 下午【中醫講座】未病先防｜中醫教你為家人守住健康防線

2026-06-13 3:30 下午有人共鳴—— 一個很小、很溫柔的喪親分享聚會

2026-06-12 7:00 下午【線上講座】家支援醫事講・老年腫瘤學新視角

疑難排解

我們有一群專業的醫護人員及相關朋友，隨時解答大家的疑難，立即提交疑問！

按此問問題

會員註冊

成為會員，可以第一時間接收由病患者和照顧者角度出發的資訊，立即行動！

按此註冊

或許你會想看

2025-4-28 AI 對肺癌防治有用嗎？聽聽這些專家怎麼說！