粉紅天使－落入凡間的天使

文章

杏林專欄 > 粉紅天使－落入凡間的天使

粉紅天使－落入凡間的天使

09-09-2017

乳癌患者在抗癌路上，最辛苦、最徬徨的莫過於化療，持續數月的治療，看著頭髮一根一根的掉落，面對無數的未知數，哪裡買假髪？我可唔可以返工？醫生可以幫到的其實不多，我們著實需要一些同路人引領我們，幫助我們渡過難關，她們便是今集的主角，落入凡間的粉紅天使⋯⋯

初初接觸粉紅天使，是在一個偶然的情況下收到她們的宣傳單張⋯⋯

「全球華人乳癌組織聯盟⋯⋯咩組織黎㗎？咁似D『亞太區』最受歡迎男歌手咁嘅，『亞』皆老街以北『太』子道西以南嗰D『亞太區』，係咪呃人㗎？」

之後放埋一邊，直到有一日，有位叫Candy 嘅小姐陪病友黎睇醫生⋯⋯

「咦，乜咁熟口面嘅？咁似我喺Facebook喺蘋果報導見過⋯⋯」

圖片來源：蘋果日報

無錯，她就是人稱關姐姐（唔係關家姐），『乳癌路上』的作者，Candy Kuan賴關裕穠。

她主動提出送出她的著作「乳癌路上」去診所給新確診乳癌的同路人，細看之下裡面還有一張單張，那一張我開始以為係呃人嘅單張。

「咁大隻蛤那隨街跳？免費陪做化療？」

原來呢個世界真係有咁大隻蛤那，仲要唔止一隻，係幾十隻。（請原諒我咁形容我們可愛的天使們，不過咁寫順暢D，絕無不敬之意）

喺Candy嘅穿針引線底下，有幸認識到「化療陪診服務」的牽頭人－Mary Wong。

過來人Mary從自身的體會，加上在乳癌組織服務多年的經驗，明白到社會正正缺乏呢方面的服務，一個離納入正規醫療機構還有很遙遠距離的服務。

她們的理念很簡單，就係攜手同行化療路，由到達醫院一刻，直到回到家中，無時無刻陪伴在側。

為免瓜田李下，服務對象暫時局限在八間公立醫院接受化療的病友。

在收到陪診服務要求後，Candy就會按住期數、年齡、所屬區份（包括接受化療的醫院及住址）等等因素進行配對，盡量安排一至兩個情況相近的天使負責照顧。在化療當天，分別會在以下地點集合，屆時天使會穿上漂亮的制服以資識別。

瑪麗醫院：S座一樓

東區醫院：入院登記處

伊利沙伯醫院：R座地下

瑪嘉烈醫院：急症室門口

聯合醫院:入院部

明愛醫院：懷明樓地下

威爾斯親王醫院：包玉剛癌症中心地下

屯門醫院：會計部地下

以上圖片由天使走訪八大醫院提供

之後天使會陪你登記、陪你交費、陪你等配藥、在漫長的等候過程陪你傾計，分享一D實用的小貼士比你，直到你落完藥陪埋你返屋企。

為咗保障病人私隱及義工安全，一般會在屋企樓下，或交通總匯（例如地鐵站、巴士站）分別。之後夜晚關姐姐會分別致電病友同天使確保一切順利。其實Mary同Candy真係好細心，佢地連義工天使的情緒也照顧到，因為始終無條件付出，同行一條過往的不愉快道路，負面情緒係可以預期的，所以下一步組織的方向就係為義工提供陪訓，將一D負面嘅野變成正面，令天使更加堅強，助人自助。

呢個服務由2017年4月開始起動，需求只會越來越大，實在需要同路人的大力支持，大家不妨在克服人生最大逆境的同時，嘗試由另一角度賦予它一種積極正面的意義。沒有你的幫助，神話係冇可能延續下去的。如果你有興趣幫手，可以打電話35958678聯絡關姐姐。

另一方面，如果朋友有這方面的需求，不妨分享粉紅天使的故事給她們，讓她們在黑暗中找到一點光。