癌媽媽產子仲有戲

傳媒專區

傳媒專區 > 媒體報導 > 癌媽媽產子仲有戲

癌媽媽產子仲有戲

27-05-2009

癌媽媽產子仲有戲

做觀眾經常話無記劇集煽情唔合理，生活幸福的主角無端端發現有末期癌症，飽受治療煎熬後，赫然又發現懷孕，拉拉扯扯做個苦情大長篇。正當我們說做戲咁做，偏偏發現一個真實個案，但主角並沒有怨天尤人，而是全家積極面對，打敗癌症之餘寶寶亦健康成長，這齣戲，仲有排做。
記者：林佩婷
攝影：陳陶鈞

住所附近的小石灘，成為全家蒲點。

心理上最難受

看到自言比生仔後治療前還要肥10磅的芷荺，行動敏捷、聲如洪鍾，實在很難和絕症病人拉上關係。但回想當時情況，猶有餘悸。「07年3月發現頸後有粒嘢凸起，發燒成個月都未驗到咩事，醫生初診為肺癆，係自己覺得唔妥主動再 Check，先發現係淋巴癌，再抽埋骨髓照埋 CT Scan證實係非何傑金氏淋巴癌，體內同骨髓都有癌細胞，屬於第四期。最記得第一下知道係咁喊，嗰陣心理上最難受，大仔恩諾得兩歲咋……」第一針化療後已甩頭髮，「真正覺得自己係個病人。」最深刻還是白血球太低入院住無窗的獨立房，以為自己多患了幽閉恐懼症。

發病前一個月的照片，從沒想過一個月後死亡走得那麼近。	芷荺話化療後開始甩頭髮時最難受。 .
化療期間特地買了很多頭巾及帽用來扮靚，誓要做個型病人。	化療後仍等到足月生產，最開心是 BB正常健康。

患病創業

一場病變，為這個家帶來兩個重要的決定。「我本來做社工，囝囝交畀奶奶湊。以前成日都諗不如辭工用多啲時間陪個仔，但又唔捨得份收入唔錯嘅工。病後辭工，接恩諾返屋企，令我有更多時間見證佢成長。最初都擔心體能又或適應唔到，但點知大家都玩到癲咗，得閒去公園、圖書館、甚至捉魚仔，呢啲以前都無諗過，覺得其實係個天畀第二次生活機會我。」至於另一轉變，莫過於在化療後，老公 Daniel決定到內地發展。「其實諗咗好多年，一直都驚個仔太細而有猶豫。太太病後無工作可以自己湊，所以我毅然放低壓力北上創業，到呢刻我都無後悔當日嘅決定。」

第二個考驗

多得這場病，兩夫婦才突破現狀突破自我。然後，好不容易完成化療，醫生說體內的癌細胞已經沒有，但骨髓依然有些不明物體，徵詢其他醫生意見又反應不一，頓時令兩人覺得兩頭唔到岸。「係信仰令我重新振作，決定唔做其他治療，只做定期檢查。」本着順其自然，誰不知不夠半年，又來一次考驗。「07年9月完成化療，到08年4月竟然發現懷孕3個月，嗰刻唔係開心而係超驚，第一個反應係唔敢要！因為中途照過 CT Scan，好驚影響個胎，又擔心懷孕期間復發。當時已經11周，好在主診醫生畀到我信心，話可以8個月分娩。最後覺得天父賜我禮物，於是安然接受。」

產後當增肥

慶幸懷孕期間芷荺超健康，巴士照追街照去，還帶大仔去番禺看動物。細仔恩灝出世時重差不多4公斤，芷荺生產後更肥了10磅，絲毫不見病態。「其實出街都可能俾車撞死，與其埋怨不如灑脫啲。雖然有時見頸起粒嘢又或腰痛就會有陰影以為復發，死亡離好遠又好近，但家䟴䟴腳唔使做等食飯，又擁有同兩個仔相處嘅寶貴時間，生活真係要笑住過。」