黃雨天，我嘅腫瘤科張醫生嚟咗睇我個展覽。
想當年，一開始我哋就係生死之交！因為當年一見面，我哋就要討論人生嘅抉擇、生死存活率嘅話題！癌症將我哋連結咗，亦都展開咗我人生嘅一段新旅程。
記得有次治療初期，我見到另一位準備見醫生嘅病人，佢著住對拖鞋同睡衣，好causal⋯⋯ 好記得佢嘅頭髮，好厚、好油、好亂⋯⋯見到佢當時我心諗，咁樣好似唔係好對路喎，成個狀態好似打定輸數咁，輸人唔輸陣，我唔可以咁㗎⋯⋯ 呢場仗唔可以咁打㗎！就喺咁，我每次出發去化療同電療前都刻意打扮，又恤衫又盛⋯⋯去到醫院見到惡姑娘就即刻笑住講姑娘早晨！打開房門見到醫生，又笑住同醫生講早晨！記得之後有一次張醫生忽然望住我，同我講，你都好特別⋯⋯ 我當時冇問佢點解咁講，我心諗，應該無乜癌症病人成日笑笑口，好似傻咗咁卦⋯⋯亦可能因為咁，後來我哋變得越嚟越熟落，睇病時嘅對話亦慢慢變得輕鬆及無所忌諱，有事實就講事實，有衰嘢亦唔去避，如果係事實，點地獄都要講！當時嘅我，唔怕聽事實，反而好怕自己呃自己⋯⋯
治療中期，亦係最恐佈嘅階段⋯⋯
嗰時成個口爛到睇唔到入面，又食唔到嘢，仲有好多好多古靈精怪嘅狀況⋯⋯ 我同張醫生講述苦況，醫生問加唔加止痛藥，定係選擇重劑量啲嘅嗎啡止痛？ 最後，我因為試過頂唔順嗰啲side effect，決定選擇唔食任何止痛藥！喺嗰時，張醫生又再同我講，你都好特別⋯⋯
記得嗰日，離開診症室前張醫生同我講咗聲唔好意思，佢話自己雖然係腫瘤科醫生，但佢自己無患過癌症，有時候未必能夠完全100%感受到晒我嘅痛楚⋯⋯ 聽完佢咁講，我個人忽然之間好感動，好多謝佢用佢嘅坦白去關心我，令我更感覺到我哋係一齊行緊呢條咁艱難嘅路。
我同張醫生有過好多嘅對話，內容好多都唔記得晒！但我就好肯定當時佢要我知道，我哋要望住遠方嘅一個目標一齊向前行！成個過程，我哋就好似身處喺怒海中嘅一條小船，無論風浪幾大，都要繼續頂硬上向前進發！
好多謝佢呢個掌舵人，喺呢個睇唔到盡頭嘅地方，帶領住我喺黑暗裡面前行尋找光明。
完成治療，幸運地我慢慢復原⋯⋯
我同張醫生也由覆診時見面嘅病人醫生關係，變成得閒食吓飯嘅朋友⋯⋯
慢慢復工後老友鼓勵我參加動畫計劃，經歷過團隊一齊拼搏大半年後，動畫《Be With Me》就誕生了！《Be With Me》係男孩同白熊船長尋找希望嘅航海故事。然而，真正嘅內容就係我呢段治療之旅。當中亦包含咗張醫生喺治療期間與我同行嘅故事。亦因為咁，動畫後來亦用咗喺情緒教育或是鼓勵病人嘅教育工具。《Be With Me》就似係一條映像線索，幫助學員去聯想或回想佢人生裡面嘅up and down，再去尋找一下自己內在嘅情緒同需要。
今日，同張醫生睇完展覽，我哋兩個排排坐喺動畫室一齊觀賞《Be With Me》。當白熊船長一出場，我忍唔住講：呢個你嚟㗎！睇到最後，旅程亦完結，心裡有種唔知點形容嘅感動⋯⋯ 雖然事情都過咗好多年，但今日同當年醫好你嘅醫生，輕鬆坐喺度一齊睇返描述當年經歷嘅動畫，情緒好複雜，真係可謂百感交集。離開展館，張醫生同我講：動畫好感動。我好開心咁答佢：你有份㗎！
帶住呢份感動，我諗起呢個展覽就覺得好奇妙⋯⋯ 癌症資訊網慈善基金呢個嘉年華，將一個一個唔同範籌嘅同路人、朋友連埋一齊⋯⋯ 大家打開自己個心去做一啲自己堅持同相信嘅嘢，然後好好分享再傳開去⋯⋯
當人生裡面嘅陰晴月缺我哋控制唔到嘅時候，我諗，我哋只可以做好啲自己，相信多啲自己⋯⋯ 然後，同自己關愛嘅人好好咁行落去，搵吓生活裡面仲有啲咩值得我哋珍惜，同埋可以好好擁抱嘅嘢，就好好繼續去搵自己嘅美好人生。
我諗，呢個re:start嘉年華個目的都咁⋯⋯ 人生係會一直向前行嘅，覺得唔太順利，好低谷，其實都冇話行唔到落去⋯⋯ 試吓re:start，無人知前面仲會遇上乜嘢風景嘅！至少，我仲係咁諗。
