【癌症手術】拆線好，定唔使拆線好？｜黎逸玲醫生

文章

杏林專欄 > 外科 > 黎逸玲醫生 > 【癌症手術】拆線好，定唔使拆線好？｜黎逸玲醫生

【癌症手術】拆線好，定唔使拆線好？｜黎逸玲醫生

06-03-2023

好多病人都有一種信念，自己溶唔使拆嘅線係比較高科技、傷口會靚啲。當私家醫生話傷口要安排拆線嘅時候，唔少病人嘅第一個反應係「吓？要拆線呀？無得自己溶咩？」，反之公立醫院病人比較少提出呢種質疑。（可能大眾都覺得醫管局唔會用靚嘢）😂

外科縫線有兩種：可吸收縫線(absorbable suture)同埋不可吸收縫線(non-absorbable suture)。兩種縫線其實一直都存在，各有用途，並冇高低級之分。可吸收縫線由羊小腸黏膜嘅膠原蛋白或者合成纖維製成，依靠人體組織對外來物質產生發炎反應去溶解縫線，然後被巨噬細胞吞噬同消化，吸收時間需要大約三至六個月。至於不可吸收縫線可以由尼龍、聚丙烯等物料製成，只能靠拆線先會消失。

用自己識溶嘅縫線除咗可以慳返拆線時間同避免拆線時嘅少少唔舒服之外，皮膚疤痕唔一定會靚啲。由於可吸收縫線留喺體內嘅時間較長，有機會增加發炎、排異反應(foreign body reaction)，形成縫線肉芽腫(stitch granuloma)或膿傷，疤痕會更肉酸。外科醫生用不可吸收縫線去處理皮膚傷口時，一般都係逐針逐針縫，可以更精準對齊傷口兩邊高低；而用可吸收縫線時，通常都係一針過，萬一中間有個位縫得差左少少，一係當睇唔到、一係由頭再縫過，傷口長少少都會嘔血。🤢

其實想減少疤痕產生，最緊要係計劃好落刀嘅方向同位置(例如順住皮膚嘅紋理、皺紋)、以及手術過程精細輕巧減少傷口邊緣皮膚嘅破壞，最後揀選(物料同大細)適合嘅縫線同縫合方法去降低傷口嘅張力同埋組織炎症反應。如果用不可吸收縫線，仲要擇個好日子拆線(太快拆傷口又未埋、太耐拆就會變蜈蚣疤痕)！

P.S. 大家有機會留意吓身邊親友臉上有傷口嘅話（例如皮膚癌手術或者創傷引起嘅傷口），醫生十居其九都會用不可吸收縫線去縫針。而家大家明點解啦？😎

外科手術黎逸玲醫生疤痕拆線可吸收縫線不可吸收縫線聯針癌症腫瘤

城中活動

2026-06-28 4:00 下午擁抱自己 · 瑜伽與心靈工作坊

2026-06-24 「舞」走麻痺臨床研究

2026-06-15 7:00 下午【中醫講座】未病先防｜中醫教你為家人守住健康防線

疑難排解

我們有一群專業的醫護人員及相關朋友，隨時解答大家的疑難，立即提交疑問！

按此問問題

會員註冊

成為會員，可以第一時間接收由病患者和照顧者角度出發的資訊，立即行動！

按此註冊

或許你會想看

2025-4-28 AI 對肺癌防治有用嗎？聽聽這些專家怎麼說！