<醫管局IT System 急需 upgrade>

當香港正在想發展智慧城市, 人工智能和大數據發展在各行各業高唱入雲. 但醫管局的電腦系統, 我懷疑只是停留在windows 2000 (甚至是windows 98) 的水平. 要發展MedTech 實在遙不可及.

早幾天在電療門診當中, 為一個肺癌腦轉移病人, 安排立體定位高能量腦部電療. (stereotactic radiosurgery) .首先和病人解釋點解需要做這個治療, 和相應的各樣副作用. 接着便要在電腦中尋找相應的那一份同意書pdf (有非常多份), 跟着要把這份print出來. 由於printer 型號非常殘舊, 列印大概八頁單面同意書, 會中間jam紙已經司空見慣. 最後在這八頁紙當中搵到一個位醫生簽名, 再交給病人簽名.

以為簽完就搞掂? 仲未. 另外仲有一頁同意書, 是需要額外貼label再簽名. 呢張紙仲要自己寫日期等等. 簽完以為搞掂. 點知後來同事提我, 由於做電療設計之前, 需要做腦部電腦掃描,和磁力共振, 每樣都需要打顯影劑. 所以需要在電腦找出另外這兩份同意書的pdf, 每份大約6頁紙, 再續分列印出來再簽過. 因為打顯影劑有機會腎臟有損傷或者過敏. 所以每照一次要簽一份同意書. (其實病人已經做過好多次….). 這個規矩好似只是在醫管局當中有….. 簽曬所有文件後唔要張一分, 慢慢整理在folder當中.

搞掂曬對好曬所有文件, 仲要在一個技術應該是notepad 啲細box 當中打返今次的病歷.. 跟着仲要在電腦慢慢search 一返每次的診斷, tick 啱曬格仔….. 最緊要是診斷的那些ICD code入得清清楚楚…..
病人的太太也忍不住說, 原來醫管局醫生時間咁寶貴,但大部分就花費在 print 東西和文書工作, 實在是資源錯配.

那個時候我只有苦笑. 因為現實上, 真的差不多在門診當中, 七成時間都是處理文書工作. 所以有時病人問點解醫生唔可以花多點時間在病人身上., 係因爲要符合醫管局定下各繁瑣文書工作. 否則到時到候又有什麼總部audit , 去睇下大家有冇入漏嘢或者剔錯野. 假若醫管局能夠請一隊專門人員, 負責指示入ICD code 又或者整理文書, 相信會慳返醫生唔少時間.

其實有時見到門診很多病人等候時間很長, 其中一個原因是因為實在文書工作太繁複. 例如在外國很多地方, 病歷早就是用語音記錄, 打字員後來幫醫生打返病歷.. 又或者現在有些地方已經是語音輸入. 基本上你直接講就得. 更加好的事其實很多東西可以用語音指令, 可以多啲automation, 實在慳時間而且提升準確度.

總言之醫管局的整個系統CMS, 是一個頗為舊式的系統. 可能是20幾年前開始用了之後, 很難整個系統一次過 upgrade. 所以每一次update 都係小修小補. 就好似windows 一樣越嚟越慢. 因為入邊啲core code 做得唔好, 不斷添加新東西. 另外其中一樣令到大家都非常苦惱, 是每次開一些病人的病的時候, 會彈出很多 alert box. 情況就好似大家去睇網頁, 突然間會彈多兩個advertisement windows 一樣, 原意是希望醫生要留意該病人一些特別的注意. 但當每一個病人都是這樣, 習慣性大家都是撳落個交叉度. (大家可以諗下如果chrome 冇裝 ad blockers 嘅情況…)

要改善這個系統的方法, 我建議醫管局可以將成個CMS 轉open source. 然之後舉辦幾次 hackathon, 應該就可以立竿見影地改善. 又或者直接外判比科技公司做好過.

除左軟件之外, 硬件亦是非常大的問題. 不少電腦經常hang 機. 有時要打開一個pdf , 可以等分幾兩分鐘都未開到. 成個機frozen. 另外轉駁去睇影像, 例如是X ray, CT, MRI 的那一個系統亦非常緩慢. 有時開幾分影像要load半分鐘都有可能. 估計除咗CPU 非常慢之外, 成個網絡系統的bandwidth 根本唔夠. 唔知道醫管局的內聯網是那些線路, 既然學界和政府都想發展人工智能醫療科技, 最起碼應該內部用光纖網絡可能會好好多. 當然那些經常jam 紙張啲printer也是很討厭. 其實近這十年無論你去登記寬頻電話, 又或者去銀行要簽名. 很多都已經改為電子版上簽名. 唔需要經常印紙張出嚟, 因為實在非常浪費紙張. 而且有些醫療程序例如輸血, 實在唔需要每一次輸血都重新簽一份同意書. (特別那些經常輸血的病人)應該在電腦中列明譬如輸血這個同意書有效期為一年. 實在節省大家不少時間. 即使明白輸血每一次都有一定風險, 但不少藥物每次進食和注射也有一定風險, 倒不會每一次吃藥也要簽一份同意書吧?

從我這個用家的估計, 整個系統還是用一個傳統servers 和 terminals 的方法. Servers 應該也不是用非常強的硬件, 所以很容易跪低. 隨著醫療界對於電腦系統的需求增加, 應該考慮改為cloud computers 又或者利用blockchain 技術. 應該可以增加整個病歷系統速度和可靠度.

我成日都說笑, 如果香港國際金融中心, 買賣股票是用於醫管局的電腦系統, 相信無論是基金大戶或者散戶, 每日都唔知打爆幾多個mon.

總言之, 要配合臨床的需要和政府發展醫療科技的大方向, 醫管局的IT系統急需upgrade.

有興趣的, 下一篇討論下醫管局開藥和配藥是否有改善空間.

蘇子謙醫生 (臨床腫瘤專科)