3D立體乳房造影－3D？2D？睇真D！

文章

杏林專欄. > 外科 > 馬國權醫生 > 3D立體乳房造影－3D？2D？睇真D！

3D立體乳房造影－3D？2D？睇真D！

30-04-2017

3D立體乳房造影－3D？2D？睇真D！

唔知由幾時開始，「3D」呢兩隻字對我地好似有特別魔力咁，所有野加個「3D」就即刻覺得好正好正，頓時升格十倍。細路仔去迪士尼睇電影要3D，後生仔打機又要3D，連普通睇電視都要3D。醫生都係人，所以逃唔出萬有引力，今次乳房造影都加個「3D」比佢，係咪頓時覺得正咗好多先？由於亞視已經執咗笠，今次唔係由大姐明帶你睇真D，而係由breasthk同你睇真D⋯⋯

2D乳房X光造影

未講3D之前，先由淺入深，講咗咩係2D先（拿拿拿，我都話3D對你有特別吸引力㗎啦）：

傳統嘅乳房造影就係將一個立體的器官（乳房）壓成平面，再照一張X光睇下裡面有冇問題。「壓」呢個過程就係你成日聽到嘅「夾胸」。

一個立體器官裡面如果有問題，我地要定位，自然要有三個軸（X axis，Y axis同z axis）的座標，所以醫生會幫你夾兩個角度，一個側側地睇（MedioLateral Oblique view, MLO），一個鳥瞰式咁睇（Cranial Caudal view, CC）。

「明明地，兩個角度定到位咁仲有咩問題？」

將立體變成平面咁睇，諗都諗到有問題，就係唔同層次的影像會疊埋曬一齊（即係你個影遮住我個影），之後有兩個問題會發生：一係有事的地方被前後組織遮住咗（即係有事但偵測唔到），一係就調返轉，明明冇事但D影像疊埋一齊誤以為個度有舊野（即係冇事當有事）。兩個情況都係唔理想的，一個就錯失左及早診治的機會，一個就明明冇嘢但嚇餐飽。

「咁好大問題喎⋯⋯」

傳統醫生如果有懷疑但唔肯定，通常會叫病人返黎翻照，例如Magnification view／spot compression view等等，希望加大D壓力、放大D、唔同角度等等去睇真D。又或者輔以其他方式（例如超聲波、磁力共振），去睇清睇楚。

無論用咩方法都好，當病人一收到醫生／醫院電話要翻照，三魂都一定唔見咗七魄，以為自己呢次死喇死喇實出事喇，原來好多時呢D recall只係技術局限照唔清楚，並唔係自己諗到咁灰咁。

為咗突破呢種局限，就輪到我地呢集主角出場，登燈登櫈，3D立體乳房造影，等我帶大家睇真D。

3D立體乳房造影

「咁3D立體乳房造影又係咩黎呢？洗唔洗帶3D眼鏡睇？」

隨著醫療科技大躍進，2011年推出咗第一代的3D立體乳房造影（Tomosynthesis），佢嘅原理係希望用唔同角度（正負7.5度）去望個乳房（立體器官用返立體的方式去評估），咁就可以分辨出唔同層次的組織（原理有如電腦掃描CT scan咁，將乳房每1mm切開一個斷層黎睇，就好似一本書有好多頁，醫生就遂頁遂頁睇，所以係唔洗帶3D眼鏡睇嘅），希望可以解決有病變但被人遮住，或者冇野以為有野的問題。

「咁好正喎，點解唔大規模採用嘅？」

第一代Tomosynthesis有兩大問題，第一係價錢，因為傳統乳房造影只係睇四張X光片，但3D立體乳房造影動輒要睇成幾十張片（1mm厚一張片），撰寫報告嘅人力物力要求大大增加，成本自然好可觀。

第二係輻射量，因爲除左要照多角度之外，傳統2D嗰兩個角度（MLO，CC）都要照，所以輻射量大概係傳統乳房造影的兩倍（因爲佢要照一套3D，之後再照一套2D，廠叫呢個做Combo Mode）。

一聽到貴，二聽到輻射，三再加上缺乏大量數據支持（因為新），所以阻礙咗佢大規模嘅發展（其實都叫發展得好迅速㗎喇）。

第二代3D立體乳房造影

「咁好可惜⋯⋯」

又唔洗咁快可惜住，有得第一代自然有第二代（2013年推出），而家輻射嘅問題已經9成獲得解決，3D立體乳房造影的輻射量已經同傳統乳房造影相約。佢已經唔洗再分照一套3D一套2D，個系統已經進步到只照一套3D，就已經可以後製合成做2D片（用一個叫C-View嘅軟件後製，廠叫呢個做TomoHD Mode）。照多咁多角度，但輻射量竟然差不多，呢個係一個好驚人的進步。

「咁好，咁公立醫院有冇得照呢？」

一間間，有D教學醫院／龍頭醫院有，有D資源冇咁豐富嘅醫院當然暫時未有。

「咁如果我自己出去照又幾貴？」

如果係私家做3D立體乳房造影加超聲波，大概＄3800，相比起傳統乳房造影加超聲波的＄2200，仲係貴咗一節。

「貴咁多，仲有冇其他賣點先？」

3D立體乳房造影仲有標榜冇咁痛，因爲唔洗好似傳統咁夾到扁晒，對於一D怕痛的女士係好吸引嘅。

而且佢用電腦合成（C-View）的後製2D片，係仲清過直接照的2D片（真係竟然咁都得），其實都唔難理解，就好似手機HDR（high dynamic range）相咁，影幾張相合成後的色域係好過直接影一張相一樣：

圖片來源：lowdose3d.com